Yevroparlament rahbari Kiyevga TAURUS raketalarini yetkazib berishga chaqirdi

Yevroparlament Prezidenti Roberta Metsola Rossiyaning Ukrainaga hujumlari kuchayib borayotgani fonida Germaniyaning TAURUS qanotli raketalarini Ukrainaga tez yetkazib berish kerakligini aytdi. Bu haqda uning bugun, 23 noyabr kuni chop etilgan “Funke” nashrlariga bergan intervyusida keltirilgan.

Metsola Yevropa Ittifoqi davlatlari AQSH kabi uzoq masofali raketalarni Rossiyadagi nishonlarga qarshi qo‘llashga ruxsat berish tarafdori yoki yo‘qligi haqidagi savollarga ijobiy javob bergan. Uning ta’kidlashicha, Germaniya Ukrainaga TAURUS raketalarini yetkazib berishi kerak.

“Ha, bu Yevroparlamentning pozitsiyasi, keling, bu Bundestagga saylovlardan keyin tegishli o‘zgarishlarga olib keladimi, yo‘qmi, ko‘ramiz”, degan Metsola.

Uning so‘zlariga ko‘ra, bunday rakurs o‘zgarishi, ehtimol, oldinroq sodir bo‘lishi ham mumkin. Chunki Berlin koalitsiyasida TAURUSni yetkazib berish bo‘yicha turli pozitsiyalar mavjud.

Bundan tashqari, Roberta Metsola ukrainalik askarlarga zudlik bilan yordam kerakligini bildirgan. Ukraina Prezidenti Vladimir Zelenskiy Ukrainada har kuni urushda odamlar halok bo‘layotganini eslatgan.

Kansler Olaf Shols uzoq vaqtdan beri TAURUSni yetkazib berishni rad etib kelmoqda. U Germaniya to‘g‘ridan-to‘g‘ri Rossiya va Ukraina o‘rtasidagi urushga tortilishi mumkinligidan qo‘rqadi. Ayni paytda “Ozod demokratlar” va “Yashillar” Ukrainaga bunday raketalarni yetkazib berish tarafdori. So‘nggi kunlarda AQSH Prezidenti Jo Bayden Ukrainaga Rossiya hududiga chuqur zarba berish uchun 300 kilometrgacha masofaga uchadigan Amerika ATACMS raketalaridan foydalanishga ruxsat berganidan so‘ng muhokama yana kuchaydi. TAURUS 500 kilometr masofaga ega.

Eslatib o‘tamiz, avvalroq Ukraina Mudofaa kuchlari birinchi marta ATACMS ballistik raketalari bilan Rossiya hududiga hujum qilgandi va u nishonga muvaffaqiyatli urilgandi. Zarba Bryansk viloyatining Karachev shahri yaqinidagi harbiy ob’ektga berilgandi. Shundan so‘ng 21 noyabr kuni ertalab Rossiya qo‘shinlari Ukrainaga qit’alararo ballistik, aeroballistik va qanotli raketalar bilan hujum qildi.