Yevropa o‘z xavfsizligi uchun javobgar – Pistorius

AQSHning yangi ma’muriyati qarorlaridan qat’i nazar, yevropaliklar endi Yevropa xavfsizligi uchun har qachongidan ham ko‘proq mas’uliyatni o‘z zimmasiga oladi. Bu haqda Germaniya Mudofaa vaziri Boris Pistorius kecha, 22 yanvar kuni Litvaga safari chog‘ida “Deutsche Welle” nashriga bergan intervyusida so‘z ochdi.

“Donald Tramp, Oq uy va yangi ma’muriyatning kun tartibi qanday bo‘lishidan qat’i nazar, biz ko‘proq mas’uliyatni o‘z zimmamizga olishimiz kerak”, degan vazir.

Mudofaa vazirligi rahbari, shuningdek, ushbu strategiyaning tarkibiy qismlaridan biri 2023 yilning yozida Litvada Bundesver brigadasini doimiy joylashtirish to‘g‘risida qabul qilingan qaror ekanini ta’kidladi. Dastur “rejalashtirilganidek” davom etmoqda va “yo‘l xaritasi” o‘z vaqtida yakunlanadi.

U to‘liq brigada infratuzilma bilan ta’minlangan holda tayyorlanishini qo‘shimcha qildi. Vazirning so‘zlariga ko‘ra, 2025 yil oxiriga kelib, kelgusi ikki yil davomida rejalashtirilgan Bundesverning dastlabki 5000 askaridan 500 ga yaqini Litvada joylashtiriladi.

Germaniya Mudofaa vazirligi rahbarining so‘zlariga ko‘ra, Amerikaning yangi ma’muriyati katta ehtimol bilan o‘z e’tiborini Hind-Tinch okeani mintaqasiga qaratadi.

“Biz amerikaliklar bizning farovonligimiz va xavfsizligimiz uchun Hind-Tinch okeani mintaqasida ko‘proq harakat qilishlarini kuta olmaymiz”, degan u.

Biroq Pistorius NATO kelajagi haqida xavotirda emasligini aytdi.

“Men NATOning kelajagi haqida unchalik xavotirda emasman, chunki men Qo‘shma Shtatlardagi yoki Myunxen xavfsizlik konferensiyasidagi barcha suhbatlarimdan bilamanki, ko‘pchilik amerikaliklar Yevro-Transatlantik hamkorlik ularga nima berayotganini yaxshi biladi”, dedi u.

Shu bilan birga, u Qo‘shma Shtatlar va Yevropa endi o‘z qo‘shma tarixining “bir sahifasida” ekanini aytgan.

Eslatib o‘tamiz, avvalroq SpaceX va Tesla asoschisi, amerikalik milliarder Ilon Mask Yevropa mamlakatlari, xususan, Germaniya hozirda tug‘ilishning pastligi tufayli yo‘q bo‘lib ketish arafasida ekanini aytgandi.