Yevropa Ittifoqi Gruziya rahbariyati bilan uchrashuvlarni to‘xtatdi

Yevropa Ittifoqi Gruziya rahbariyati bilan do‘stona munosabatda bo‘lmagani uchun yuqori darajadagi uchrashuvlarni to‘xtatishga qaror qildi. Bu haqda Yevropa Ittifoqining Gruziyadagi elchisi Pavel Gerchinskiy ma’lum qildi.

"Shu yilning iyun oyida biz Yevropa Ittifoqiga a’zo davlatlar bilan YeIga nisbatan nodo‘stona munosabat bilan ajralib turgan Gruziya rahbariyatiga nisbatan yondashuvimiz qanday bo‘lishini, qanday qilib anti-Yevropa va G‘arbga qarshi tashviqot, fitna nazariyalarini yengishimiz mumkinligini muhokama qilgan edik. Va biz Gruziyaning hozirgi rahbariyati bilan yuqori darajadagi uchrashuvlar o‘tkazmaslikka qaror qildik”, dedi Gerchinskiy.

Diplomatning qo‘shimcha qilishicha, so‘nggi oylarda na uning tomonidan Gruziya hukumati bilan, na Gruziya hukumati vakillari tomonidan Bryussel bilan hech qanday aloqa bo‘lmagan.

YeI, AQSH va Gruziya o‘rtasidagi munosabatlar may oyida Gruziya parlamenti tomonidan xorijiy agentlar to‘g‘risidagi qonun qabul qilinganidan keyin sezilarli darajada yomonlasha boshladi.

AQSH Mudofaa vazirligi 5 iyul kuni yozda rejalashtirilgan “Munosib sherik” Gruziya-Amerika harbiy mashg‘ulotlari strategik munosabatlarni qayta ko‘rib chiqish sababli noma’lum muddatga qoldirilganini ma’lum qildi. Pentagon bu qarorni Gruziya rasmiylari G‘arb, xususan, AQSHning Ukrainadagi vaziyat bilan bog‘liq holda Rossiyaga bosimni kuchaytirish uchun ikkinchi front ochishga urinishlarini e’lon qilgani bilan asosladi. Amerika tomoni bunday bayonotlar yolg‘on ekanini da’vo qilmoqda. Xuddi shu sababga ko‘ra, YeI Gruziya Mudofaa vazirligiga ajratilishi rejalashtirilgan 30 million yevroni muzlatib qo‘ydi.