YeI Rossiyaga qarshi cheklovlarni chetlab o‘tgani uchun Belarusga sanksiyalarni uzaytirdi

Yevropa Ittifoqi Ukrainadagi mojaro tufayli Rossiyaga nisbatan joriy qilingan cheklovchi choralarni chetlab o‘tgani uchun Belarusga nisbatan sanksiyalarni kengaytirdi. Bu haqda Bryusselda e’lon qilingan Yevrokomissiya bayonotida aytiladi.

“Yangi chora-tadbirlar Yevropa Ittifoqining Rossiya va Belarusga nisbatan sanksiyalarini yanada yaqinlashtirishni va Rossiya sanksiyalarini Belarus orqali chetlab o‘tib bo‘lmasligini ta’minlaydi”, deyiladi xabarda.

Ma’lum qilinishicha, Yevropa Ittifoqi Belarusga mamlakat harbiy kuchini yaxshilashga hissa qo‘shadigan tovarlar va texnologiyalarni, shuningdek, o‘qotar qurol va o‘q-dorilarni eksport qilishni taqiqlagan.

“Ushbu chora-tadbirlar Belarusni harbiy-texnik takomillashtirishga hissa qo‘shadigan bir qator o‘ta nozik tovarlar va texnologiyalarni Belarusga eksport qilishni taqiqlashni kengaytiradi. Shuningdek, kengash o‘qotar qurol va o‘q-dorilarni hamda aviatsiya va kosmik sanoatda foydalanish uchun yaroqli tovarlar va texnologiyalarni eksport qilishga qo‘shimcha taqiq qo‘yadi”, deyiladi bayonotda.

Eslatib o‘tamiz, iyun oyi oxirida YeI uchinchi dunyo davlatlariga nisbatan bosqichma-bosqich cheklovlar mexanizmi yaratilishini e’lon qildi, bu esa Rossiya Federatsiyasiga bir qator texnologiyalar, tovarlar, jumladan, ikki tomonlama foydalanishdagi cheklovlarni chetlab o‘tishga yordam beradi.

O‘shanda YeI agar sanksiyalarni chetlab o‘tish jiddiy va tizimli bo‘lib qolsa, Bryussel ekstremal choralar sifatida butun yurisdiksiyalarga nisbatan ikkinchi darajali cheklovlarni joriy qilishini bildirgandi.