YeI davlatlari Ukrainaga 35 mlrd yevro kredit berishga kelishib oldi

Yevropa Ittifoqi mamlakatlari vakillari Ukrainaga yangi moliyaviy yordamning fundamental asoslari bo‘yicha kelishib oldi. Kecha, 9 oktyabr kuni Bryusselda erishilgan kelishuv Kiyevga 35 milliard yevrogacha miqdorda kredit berishni nazarda tutadi.

“Ushbu kredit Rossiya Markaziy bankining muzlatilgan aktivlaridan tushgan daromaddan foydalangan holda to‘lanishi kerak”, dedi Yevropa Ittifoqiga a’zo mamlakatlar vakolatxonasi.

Ushbu mablag‘lar Ukrainaga o‘tgan yozda G7 mamlakatlari tomonidan Italiyada qabul qilingan va muzlatilgan Rossiya pullari hisobidan moliyalashtirilgan Ukrainaga 50 milliard dollargacha (46 milliard yevro) kreditni o‘z ichiga olgan Ukrainaga yordam paketining bir qismi bo‘ladi.

Yevropa Ittifoqi Kengashining ushbu qarori endi rasmiy protsedura orqali tasdiqlanishi kerak, Yevropa parlamentining roziligini ham talab qiladi. Maqsad – kreditni keyingi yil ichida Ukrainaga o‘tkazish, keyinchalik uni to‘lash maksimal 45 yil ichida amalga oshirilishi.

Agar Rossiya kreditlar to‘liq qaytarilgunga qadar muzlatilgan aktivlarga kirish huquqini tiklasa, qolgan mablag‘larni to‘lash uchun YeI va uning G7’dagi hamkorlari javobgar bo‘ladi. Bu, masalan, Yevropa Ittifoqi davlatlaridan biri Rossiya Federatsiyasiga qarshi sanksiyalarni uzaytirish bo‘yicha veto qo‘ygan taqdirda sodir bo‘lishi mumkin.

Vengriya hali ham Yevropa Ittifoqi sanksiyalari doirasida Rossiya mablag‘laridan tushgan mablag‘lardan uzoq muddatli foydalanish bo‘yicha qaror qabul qilinishiga to‘sqinlik qilmoqda. Sanksiyalar har olti oyda bir ovozdan qabul qilingan qaror bilan yangilanishi kerak. Yevropa Komissiyasi Yevropa Ittifoqi mamlakatlariga muzlatilgan pullardan foiz daromadlarini olib qo‘yish muddatini uch yilga uzaytirishni taklif qildi, biroq Viktor Orban hukumati bu tashabbusni rad etdi.

2022 yil fevralidan beri Ukrainaga bostirib kirgani uchun YeI tomonidan Rossiyaga nisbatan joriy qilingan sanksiyalar doirasida Rossiya Federatsiyasi Markaziy bankining taxminan 210 milliard yevro miqdoridagi aktivlari muzlatib qo‘yildi. Bu puldan keladigan daromad hozirda yiliga 2,5-3 milliard yevro atrofida.

Jasmina Rasulova