Vuchich ham Rossiyadagi BRICS sammitiga bormaydi

Serbiya Prezidenti Aleksandr Vuchich Rossiya Prezidenti Vladimir Putinga 22-24 oktyabr kunlari Qozonda bo‘lib o‘tadigan BRICS sammitida qatnashmasligi, biroq delegatsiya yuborishini aytdi. Bu haqda kecha, 21 oktyabr kuni Serbiya davlat radiosi va televideniyesi xabar berdi.

Vuchichning aniqlik kiritishicha, delegatsiya tarkibiga Bosh vazir o‘rinbosari Aleksandr Vulin, Mudofaa vaziri Bratislav Gashich, Iqtisodiyot vaziri Adriana Mesarovich va xalqaro iqtisodiy hamkorlik bo‘yicha kurator Nenad Popovich kiradi.

Davlat rahbarining aniqlik kiritishicha, ertaga, 23 oktyabr kuni Polsha Bosh vaziri Donald Tusk Belgradga tashrif buyuradi va unga Gretsiya Bosh vaziri Kiriakos Mitsotakis ham qo‘shiladi. Yevrokomissiya rahbari Ursula fon der Lyayen keyinroq keladi. Shuning uchun u BRICS sammitiga bormaydi.

Ma’lumot uchun, BRICS – bu Rossiya, Braziliya, Hindiston, Xitoy va Janubiy Afrika Respublikasini o‘z ichiga olgan norasmiy davlatlar guruhi. BRICSʼni yaratish Rossiya tashabbusi bilan boshlangan. Tashkilot formatidagi birinchi vazirlar uchrashuvi 2006 yil 20 sentyabrda Nyu-Yorkda BMT Bosh Assambleyasi sessiyasi doirasida bo‘lib o‘tgan.

Sentyabr oyida NATO a’zosi Turkiya BRICS’ga a’zo bo‘lish uchun ariza bergani ma’lum bo‘ldi. Janubiy Afrika Prezidenti Siril Ramafosa 2023 yilning avgust oyida Argentina, Eron, Saudiya Arabistoni, Misr, Efiopiya va Birlashgan Arab Amirliklari to‘liq a’zo bo‘lishga taklif qilinganini e’lon qildi. Argentina keyinchalik bu qadamdan voz kechdi.

Eslatib o‘tamiz, avvalroq Braziliya Prezidenti Rossiyaga parvozini bekor qilgandi. Luis Inasiu Lula da Silva Qozonda bo‘lib o‘tadigan BRICS sammitida ishtirok etish uchun Rossiyaga borishi kerak edi. Braziliyadagi Sirio Libanes shifoxonasi tomonidan e’lon qilingan tibbiy xulosaga ko‘ra, siyosatchiga uzoq masofalarga havo qatnovidan qochish tavsiya etilgan. Ammo boshqa yo‘l bilan u o‘zining oddiy vazifalarini bajarishga qodir.

Tibbiy xulosada aytilishicha, Prezident boshining “oksipital qismi” jarohat olgan. Idora ma’lumotlariga ko‘ra, u uyida tasodifan jarohatlangan.