O‘zgidromet shoshilinch ogohlantirish bilan chiqdi

O‘zgidromet tog‘ va tog‘oldi hududlarida yashovchi aholini ogohlantirdi. Bu haqda O‘zgidromet agentligi rahbari Sherzodxo‘ja Habibullaxo‘ja o‘zining Facebook'dagi sahifasida ma’lum qildi.

Unga ko‘ra, joriy yilning 26-28 avgust kunlari O‘zbekiston hududiga nam va salqin havo massalari kirib keladi. Respublika hududi bo‘yicha 26-27 avgustda shamol tezligi 17-22 m/s gacha kuchayishi kutilmoqda. Ba’zi joylarda shamol 23-25 m/s gacha kuchayishi, ayrim joylarda chang-to‘zonlar bilan kuzatilishi mumkin.

27-28 avgust kunlari kunduzi havo harorati 23-28 darajagacha pasayadi. 26 avgustda respublika shimolida va cho‘l hududlarda, 27-28 avgustda qolgan hududlarda ham vaqti-vaqti bilan yomg‘ir yog‘adi, momaqaldiroq bo‘lishi mumkin. Tog‘ oldi va tog‘li hududlarda yomg‘ir yog‘adi, ba’zi joylarda tezlashadi.

Ko‘p miqdordagi yomg‘ir yog‘ishi hisobiga respublikaning tog‘ oldi va tog‘li hududlarida 27-29 avgust kunlari sel-suv toshqin hodisalari yuzaga kelishi mumkin.