Ўзгидромет шошилинч огоҳлантириш билан чиқди

Ўзгидромет тоғ ва тоғолди ҳудудларида яшовчи аҳолини огоҳлантирди. Бу ҳақда Ўзгидромет агентлиги раҳбари Шерзодхўжа Ҳабибуллахўжа ўзининг Facebook'даги саҳифасида маълум қилди.

Унга кўра, жорий йилнинг 26-28 август кунлари Ўзбекистон ҳудудига нам ва салқин ҳаво массалари кириб келади. Республика ҳудуди бўйича 26-27 августда шамол тезлиги 17-22 м/с гача кучайиши кутилмоқда. Баъзи жойларда шамол 23-25 м/с гача кучайиши, айрим жойларда чанг-тўзонлар билан кузатилиши мумкин.

27-28 август кунлари кундузи ҳаво ҳарорати 23-28 даражагача пасаяди. 26 августда республика шимолида ва чўл ҳудудларда, 27-28 августда қолган ҳудудларда ҳам вақти-вақти билан ёмғир ёғади, момақалдироқ бўлиши мумкин. Тоғ олди ва тоғли ҳудудларда ёмғир ёғади, баъзи жойларда тезлашади.

Кўп миқдордаги ёмғир ёғиши ҳисобига республиканинг тоғ олди ва тоғли ҳудудларида 27-29 август кунлари сел-сув тошқин ҳодисалари юзага келиши мумкин.