“O‘zcharmsanoat” uyushmasi raisi ishdan olindi

“O‘zcharmsanoat” uyushmasi raisi Akbar Sultonov lavozimidan ozod etildi. Bu haqda bugun, 13 fevral kuni Prezident Shavkat Mirziyoyev raisligida o‘tayotgan tarmoq va hududlarda yuqori iqtisodiy o‘sish sur’atlarini ta’minlash bo‘yicha asosiy vazifalar muhokamasiga bag‘ishlangan yig‘ilishda ma’lum qilindi.

Qayd etilishicha, poyabzal ishlab chiqarishda moda va dizayn tez o‘zgarmoqda. Korxonalar hozirdan zamon talabiga mos holda ishlamasa, nafaqat tashqi, balki ichki bozorda ham raqobat qila olmasligi ta’kidlangan.

Lekin “O‘zcharmsanoat” uyushmasi rahbariyati sohaga yangilik olib kirmagani, pastga tushib ishlamagan.

Poyabzal ishlab chiqaradigan 972 ta korxonadan 378 tasi faoliyatini to‘xtatgan bo‘lsa, yana 120 tasi quvvatini yarmidan ham foydalanmayapti. Qolip, bog‘ich, furnitura bo‘yicha haligacha importga bog‘liqlik bor.

Oqibatda o‘tgan yili eksport bo‘yicha va’da qilgan 250 million dollarning 40 foizi ham ta’minlangani yo‘q. Uyushmaning bu yilgi ishlab chiqarish va eksport rejasi ham qoniqarsiz ekani ko‘rsatib o‘tilgan.

Shu munosabat bilan “O‘zcharmsanoat” uyushmasi raisi A.Sultonovni lavozimidan ozod etishga ko‘rsatma berildi.