O‘zbekistonga giyohvandlik vositalarini olib kirmoqchi bo‘lganlar ushlandi

Davlat chegarasi orqali Tojikiston va Qirg‘izistondan o‘tkazilgan giyohvandlik vositalari to‘xtatib qolindi. Bu haqda Davlat xavfsizlik xizmati ma’lum qildi.

Giyohvandlik vositalarining kontrabandasiga qarshi kurashish doirasida DXX Chegara qo‘shinlari harbiy xizmatchilari tomonidan olib borilgan tezkor-qidiruv tadbirlari natijasida bir nechta noqonuniy holatlarga chek qo‘yildi.

Jumladan, “o‘zbek-tojik” davlat chegarasining Samarqand viloyati Urgut tumani Chep qishlog‘i hududidan o‘tgan qismida, noma’lum shaxslar tomonidan Tojikistondan olib kelinib, qoldirib ketilgan 980 gr. “geroin” moddasi borligi aniqlanib, protsessual tartibda rasmiylashtirib olindi. Hozirda ushbu giyohvandlik vositasi egalarining shaxsiga aniqlik kiritish bo‘yicha zarur chora-tadbirlar amalga oshirilmoqda.

Andijon viloyatida kuzatilgan holatda, Qo‘rg‘ontepa tumanining Qorasuv shahrida yashovchi, 1996 yilda tug‘ilgan muqaddam sudlangan shaxs tarkibida “Pregabalin” kuchli ta’sir qiluvchi moddasi bo‘lgan 30 000 dona “Nervegesic” nomli dori vositasini Qirg‘iz Respublikasidan davlat chegarasi orqali noqonuniy ravishda o‘tkazgan vaqtida ushlandi.

Bunday qonunbuzilishi Namangan viloyatida ham qayd etilib, unda 3121 dona “Tropikamid” kuchli ta’sir qiluvchi dori vositalarini Qirg‘iz Respublikasidan kontrabanda yo‘li bilan Kosonsoy tumani hududiga o‘tkazgan vaqtlarida 1992 va 1993 yillarda tug‘ilgan 2 nafar mahalliy fuqaro ashyoviy dalillar bilan qo‘lga olindi. Shuningdek, ularning 1988 va 1993 yillarda tug‘ilgan 2 nafar jinoiy sheriklari ham protsessual tartibda ushlandi.

Hozirda uchala holat yuzasidan jinoyat ishlari qo‘zg‘atilib, qonunbuzarlarga nisbatan qamoq ehtiyot chorasi qo‘llanilgan.