O‘zbekistonda yuqori anomal issiq qayd etildi

Kecha, 29 iyun kuni Navoiy viloyati havo harorati 47,1 darajagacha ko‘tarildi. Bu haqda Gidrometeorologiya xizmati markazi mutaxassisi Erkin Abdulaxatov ma’lum qilgan. 

Ma’lumotlarga ko‘ra, “Mashiquduq” meteorologiya stansiyasida soat 13:20 da havo harorati 47,1 darajaga yetgan.

Qashqadaryo viloyatidagi “Muborak” ob-havo stansiyasida mahalliy vaqt bilan soat 16:20 da havo harorati +45,9 darajaga yetgan. “Qarshi” meteorologiya stansiyasida havo harorati +43,4 ni tashkil qilgan.

Buxoro viloyatidagi “O‘gitma” ob-havo stansiyasida soat 16:00 da +46,6 daraja, Sirdaryodagi “Oqoltin” agrometeorologiya postida esa +46 daraja issiq qayd etilgan.

Aytish joizki, O‘zbekistonda meteorologik kuzatishlar davomida eng yuqori harorat (48-49 daraja) Qizilqum cho‘lida (1983 yil iyul) va Termiz shahri hududida (1914 yil iyun-iyul) qayd etilgan.

Toshkentda maksimal +44,6 daraja issiq 1997 yil 18 iyulda qayd etilgan.