“O‘zbekistonda kiyim sotib olishga to‘g‘ri keldi”. G‘anining qochishi bo‘yicha tafsilotlar e’lon qilindi 

Afg‘onistonda hokimiyat “Tolibon” harakatiga o‘tgan kuni sobiq Prezident Ashraf G‘ani amerikaliklar bilan uchrashishdan qochgan, chunki “boshqa ishonch bo‘lmagan”. Bu haqda G‘anining xavfsizlik bo‘yicha sobiq maslahatchisi Hamdulla Mohib ma’lum qildi. 

Ta’kidlanishicha, G‘ani “Tolibon” Qobulni qo‘lga olishi arafasida “qirg‘inning oldini olish” istagini aytib, mamlakatni tark etgan. AQSHning Afg‘oniston bo‘yicha sobiq maxsus vakili Zalmay Xalilzod joriy yilning sentyabr oyida G‘anining qochib ketishi amerikaliklar va “Tolibon” o‘rtasidagi kelishuvga putur yetkazganini aytgandi. Unga ko‘ra, “Tolibon” poytaxtni bosib olishdan bir necha soat oldin Qobulga ikki hafta kirmaslikka va’da bergan. Xalilzodning aytishicha, kelishuv vaqtida AQSH ma’muriyatida hech kim G‘anining mamlakatni tark etish niyatidan shubha qilmagan. 

G‘ani qochib ketganidan so‘ng, u g‘aznadan 169 million dollar o‘g‘irlagani haqida xabarlar paydo bo‘ldi. Xabarlarga ko‘ra, G‘ani bir oy ichida qochishga tayyorgarlik ko‘rgan, rasmiylar esa kamida bir hafta oldin pulni olib chiqishga tayyorgarlik ko‘rgan. Keyinroq sobiq Prezident o‘zi bilan hech narsa olib ketmaganini aytdi. 

Mohibga ko‘ra, G‘ani va uning atrofidagi vertolyotlar Afg‘onistonni tark etayotganda 
“amerikaliklardan qochish” uchun past balandlikda uchgan. 

“Boshqa ishonch yo‘q edi. Men bir kun avval amerikaliklardan oddiy narsani so‘radim. Agar bu kelishuv amalga oshmasa, ular bizni qutqaradimi? Javob esa mujmal bo‘ldi”, degan u. 

Mohibning aytishicha, “Tolibon” “homiylari” G‘anining boshini olmoqchi bo‘lgan. Sobiq maslahatchi sobiq Prezident Afg‘onistondan millionlab dollar olib chiqib ketgani haqidagi ma’lumotni rad etgan. 

“Biz o‘zimiz bilan o‘zimizni olib ketdik. Odamlarning ko‘pchiligida almashtirish uchun kiyim yo‘q edi. Shuning uchun O‘zbekistonda ham, Amirliklarda ham, hatto Prezident uchun almashtirishga kiyim sotib olishga to‘g‘ri keldi”, deya qo‘shimcha qilgan Mohib. 

Joriy yil avgust oyi boshida “Tolibon” afg‘on hukumat kuchlariga qarshi hujumlarini kuchaytirib, 15 avgustda Qobulga kirdi va ertasi kuni urush tugaganini e’lon qildi. Avgust oyining so‘nggi ikki haftasida AQSH harbiylari himoyasida bo‘lgan G‘arb fuqarolari va ular bilan hamkorlik qilgan afg‘onlar ommaviy evakuatsiya qilindi. 31 avgustga o‘tar kechasi amerikalik harbiylar Qobul aeroportini tark etib, AQSHning Afg‘onistondagi qariyb 20 yillik harbiy ishtirokini tugatdi. Sentyabr oyi boshida Afg‘oniston muvaqqat hukumati tarkibi e’lon qilindi, unga “Tolibon”ning birinchi hukmronligi davrida tashqi siyosatga mas’ul bo‘lgan va 2001 yildan beri BMT sanksiyalari ostida bo‘lgan Muhammad Hasan Oxund boshchilik qilishi aytildi.