“Ўзбекистонда кийим сотиб олишга тўғри келди”. Ғанининг қочиши бўйича тафсилотлар эълон қилинди 

Афғонистонда ҳокимият “Толибон” ҳаракатига ўтган куни собиқ Президент Ашраф Ғани америкаликлар билан учрашишдан қочган, чунки “бошқа ишонч бўлмаган”. Бу ҳақда Ғанининг хавфсизлик бўйича собиқ маслаҳатчиси Ҳамдулла Моҳиб маълум қилди. 

Таъкидланишича, Ғани “Толибон” Қобулни қўлга олиши арафасида “қирғиннинг олдини олиш” истагини айтиб, мамлакатни тарк этган. АҚШнинг Афғонистон бўйича собиқ махсус вакили Залмай Халилзод жорий йилнинг сентябрь ойида Ғанининг қочиб кетиши америкаликлар ва “Толибон” ўртасидаги келишувга путур етказганини айтганди. Унга кўра, “Толибон” пойтахтни босиб олишдан бир неча соат олдин Қобулга икки ҳафта кирмасликка ваъда берган. Халилзоднинг айтишича, келишув вақтида АҚШ маъмуриятида ҳеч ким Ғанининг мамлакатни тарк этиш ниятидан шубҳа қилмаган. 

Ғани қочиб кетганидан сўнг, у ғазнадан 169 миллион доллар ўғирлагани ҳақида хабарлар пайдо бўлди. Хабарларга кўра, Ғани бир ой ичида қочишга тайёргарлик кўрган, расмийлар эса камида бир ҳафта олдин пулни олиб чиқишга тайёргарлик кўрган. Кейинроқ собиқ Президент ўзи билан ҳеч нарса олиб кетмаганини айтди. 

Моҳибга кўра, Ғани ва унинг атрофидаги вертолётлар Афғонистонни тарк этаётганда 
“америкаликлардан қочиш” учун паст баландликда учган. 

“Бошқа ишонч йўқ эди. Мен бир кун аввал америкаликлардан оддий нарсани сўрадим. Агар бу келишув амалга ошмаса, улар бизни қутқарадими? Жавоб эса мужмал бўлди”, деган у. 

Моҳибнинг айтишича, “Толибон” “ҳомийлари” Ғанининг бошини олмоқчи бўлган. Собиқ маслаҳатчи собиқ Президент Афғонистондан миллионлаб доллар олиб чиқиб кетгани ҳақидаги маълумотни рад этган. 

“Биз ўзимиз билан ўзимизни олиб кетдик. Одамларнинг кўпчилигида алмаштириш учун кийим йўқ эди. Шунинг учун Ўзбекистонда ҳам, Амирликларда ҳам, ҳатто Президент учун алмаштиришга кийим сотиб олишга тўғри келди”, дея қўшимча қилган Моҳиб. 

Жорий йил август ойи бошида “Толибон” афғон ҳукумат кучларига қарши ҳужумларини кучайтириб, 15 августда Қобулга кирди ва эртаси куни уруш тугаганини эълон қилди. Август ойининг сўнгги икки ҳафтасида АҚШ ҳарбийлари ҳимоясида бўлган Ғарб фуқаролари ва улар билан ҳамкорлик қилган афғонлар оммавий эвакуация қилинди. 31 августга ўтар кечаси америкалик ҳарбийлар Қобул аэропортини тарк этиб, АҚШнинг Афғонистондаги қарийб 20 йиллик ҳарбий иштирокини тугатди. Сентябрь ойи бошида Афғонистон муваққат ҳукумати таркиби эълон қилинди, унга “Толибон”нинг биринчи ҳукмронлиги даврида ташқи сиёсатга масъул бўлган ва 2001 йилдан бери БМТ санкциялари остида бўлган Муҳаммад Ҳасан Охунд бошчилик қилиши айтилди.