O‘zbekiston-Turkiya universiteti tashkil etiladi

O‘zbekistonda O‘zbekiston-Turkiya universiteti tashkil etiladi. Bu haqda Turkiya Respublikasi Prezidenti Rajab Toyib Erdo‘g‘an Oliy darajadagi O‘zbekiston-Turkiya Strategik hamkorlik kengashining ikkinchi yig‘ilishidan so‘ng ma’lum qildi. 

Ma’lumki, 29-30 mart kunlari Turkiya Respublikasi Prezidenti Rajab Toyib Erdo‘g‘an rasmiy tashrif bilan O‘zbekistonga keldi. Bu uning so‘nggi olti yilda O‘zbekistonga amalga oshirayotgan uchinchi rasmiy tashrifidir. 

Tashrif doirasida Oliy darajadagi O‘zbekiston-Turkiya Strategik hamkorlik kengashining ikkinchi yig‘ilishi bo‘lib o‘tdi va muloqot yakunlari bo‘yicha qo‘shma bayonot hamda turli sohalardagi hamkorlik bo‘yicha 9 ta shartnoma imzolandi. 

Prezidentlar yig‘ilishdan so‘ng matbuot anjumanida ishtirok etdilar. Unda Turkiya rahbari Rajab Toyib Erdo‘g‘an O‘zbekiston-Turkiya universiteti tashkil etilishi haqidagi mujdani berdi. 

“Biz transportdan energetikagacha, sog‘liqni saqlashdan ta’lim va madaniyatgacha bo‘lgan keng ko‘lamdagi hamkorlikni yanada rivojlantirishga kelishib oldik. Xususan, qardoshim [Shavkat Mirziyoyev] bilan Turk-O‘zbekiston universitetining tashkil etilishiga katta ahamiyat beramiz. Aslini olganda, biz tegishli mas’ullarni tayinladik. Ertaga ular universitet uchun mavjud binoni ko‘rishadi va biz tezda qadamlar qo‘yamiz”, deydi Erdo‘g‘an.