O‘zbekiston Panamani yirik hisobda mag‘lub etdi

Bugun, 11 noyabr kuni O‘zbekiston U-17 terma jamoasi Qatarda bo‘lib o‘tayotgan Jahon chempionatining guruh bosqichidagi so‘nggi bahsda panamalik tengqurlari bilan o‘ynadi. O‘zbekistonlik o‘smirlar o‘yinda 6:1 hisobida g‘alaba qozonib, guruhdan chiqish masalasini hal qildi.

Uchrashuvning birinchi bo‘limi har ikki jamoa vakillari uchun qiyin o‘tdi. Bir qancha imkoniyatlar bo‘lganiga qaramay, hisob ochilmadi. Xususan, taymning 21-daqiqasida darvozabon Ibrohim Shokirov raqib jamoa penaltisini qaytarib, seyv ijro etdi.

Ikkinchi bo‘lim o‘zbekistonlik futbolchilarning ustunligida boshlandi. 48-daqiqada Abubakir Shukurullayev gol urib, hisobni ochdi. 5 daqiqadan keyin Sadriddin Hasanov ham o‘z hisobiga gol yozdirib qo‘ydi. O‘zbekistonning 3-goliga esa 68-daqiqada Sayfiddin Sodiqov mualliflik qildi. O‘yinga qo‘shib berilgan daqiqalarning birinchisida Jamshidbek Rustamov, to‘rtinchisida esa Asilbek Aliyev raqib darvozasiga to‘p kiritib, hisobni 5:0 ko‘rinishiga keltirdi. Oradan 1 daqiqa o‘tib Abdusamad Saidov penaltini aniq ijro etdi va hisobni yanada yiriklashitirib qo‘ydi – 6:0. O‘yinning so‘nggida panamaliklar futbolchisi Jozef Pacheko ham gol urdi va jamoasining yagona goliga mulliflik qildi. Shu tariqa O‘zbekiston ikkinchi bo‘limda kiritilgan 6 ta gol evaziga guruhdan chiqish masalasini hal qildi.