“O‘zbekiston” mehmonxonasida yong‘in chiqdi

Bugun, 12 iyul kuni Toshkent shahridagi “O‘zbekiston” mehmonxonasida yong‘in sodir bo‘ldi. Bu haqda poytaxt Favqulodda vaziyatlar bosh boshqarmasi xabar berdi.

Qayd etilishicha, soat 14:45 da  Toshkent shahar Mirzo Ulug‘bek tumani, Mustaqillik shox ko‘chasida joylashgan “O‘zbekiston” mehmonxonasining 10-qavatida yong‘in sodir bo‘layotgani bo‘yicha Toshkent shahar FVBBga xabar kelib tushgan.

Shunga ko‘ra, qutqaruv texnikalari aytilgan manzilga soat 14:49 da yetib borib, yong‘in soat 14:54 da o‘chirilgan.

Bildirilishicha, aytilgan manzilda binoning yong‘inga qarshi o‘rnatilgan xavfsizlik tizimlari o‘z vaqtida ishlagani sababli yong‘in o‘z vaqtida tezkorlik bilan bartaraf etilgan.

Mehmonxonaning 10-qavatidagi ishchi xizmatchilar xonasi  yonib zararlangani aniqlangan. Hodisa oqibatida tan jarohati olganlar fuqarolar yo‘q.

Eslatib o‘tamiz, avvalroq Jizzaxdagi restoranda yong‘in sodir bo‘lgan edi.