O‘zbekiston xalq artisti To‘lqin Tojiyev vafot etdi

O‘zbekiston xalq artisti To‘lqin Tojiyev tabarruk 88 yoshda olamdan o‘tdi. Bu haqda O‘zbek Milliy Akademik drama teatri ma’lum qildi.

U O‘zbek Milliy akademik drama teatri ustoz san’atkori, o‘zbek dublyaj san’atining qiroli sifatida ko‘rilgan. U quyidagi filmlardagi qahramonlarga dublyajda ovoz bergan:

• "Qilich va qalqon" (SSSR filmi, 1960);

• "Alvon yelkanlar" (SSSR filmi, 1962);

• "Ahmed qayerda?" (Ozarbayjon filmi, 1963);

• "Ayoz bobo" (SSSR filmi, 1964);

• "I" operatsiyasi va Shurikning boshqa sarguzashtlari" (SSSR filmi, 1965);

• "Arshin mol olon" (Ozarbayjon filmi, 1965);

• "U zamonlar o‘tib ketdi" (Gruziya filmi, 1965);

• "Avtomobildan saqlaning" (SSSR filmi, 1966);

• "Alovuddinning sehrli chirog‘i" (SSSR filmi, 1967);

• "Kavkaz asirasi" (SSSR filmi, 1967);

• "Finist sarlochin" (SSSR filmi, 1967).

Tojiyev kinodagi rollari bilan ham tanilgan: Jurjoniy ("Abu Ali Ibn Sino"), Hakim ("Ikkinchi bahor"), Mahmud ("Mahallada duv-duv gap"), Quddus ("Besh og‘aynilar"), Omon ("Bu yerdan chegara o‘tadi", 3 qismli), Tog‘ayev ("Siz kimsiz?"), Qodirov ("Qora baliq izi", besh qismli, "Lenfilm"), Hasanov ("Hayot sening qo‘lingda") va boshqalar. Shuningdek, u radioda "Tabassum" eshittirishi, "Qarmoq" satirik radiojurnalining boshlovchisi sifatida tanilgan.

To‘lqin Tojiyev 1997 yilda "Do‘stlik" ordeni bilan mukofotlangan.