O‘zbekiston gandbol federatsiyasiga yangi rahbar saylandi

O‘zbekiston gandbol federatsiyasiga yangi rahbar etib “Navoiy kon-metallurgiya kombinati”ning bosh direktori Quvondiq Sanoqulovich Sanoqulov saylandi. Bu haqda gandbol federatsiyasi axborot xizmati xabar berdi.

Ma’lum qilinishicha, O‘zbekiston Milliy Olimpiya qo‘mitasida Sport vazirligi va MOQ rahbariyati ishtirokida mamlakat gandbol federatsiyasining navbatdan tashqari hisobot-saylov konferensiyasi tashkil etilgan. Unda federatsiyaga yangi rahbari saylangan.

Tadbirda “Navoiy kon-metallurgiya kombinati”ning bosh direktori, O‘zbekiston Qahramoni Quvondiq Sanoqulovich Sanoqulov nomzodi O‘zbekiston gandbol federatsiyasi raisi lavozimiga ilgari surilgan.

Delegatlar ushbu nomzodni bir ovozdan ma’qullagan va Sanoqulov O‘zbekiston gandbol federatsiyasi raisi lavozimiga saylangan.

Ma’lumot uchun, Quvondiq Sanoqulov 1952 yilda Samarqand viloyatida tug‘ilgan. Toshkent politexnika institutini tamomlagan, muhandis-metallurgiya, texnika fanlari doktori. U Toshkent va Navoiy viloyatlari xalq deputatlari Kengashi deputati, O‘zbekiston Respublikasi Oliy Majlisi Senati a’zosi sanaladi.

Eslatib o‘tamiz, avvalroq Mudofaa vaziri, general-mayor Shuhrat Xolmuhammedov O‘q otish sporti federatsiyasi raisi lavozimiga saylangandi.