O‘zbek boksida burilish qilgan Isroil Toshkentga qaytdi

Amerikaning Los-Anjeles shahrida bo‘lib o‘tgan katta professional boks oqshomida Isroil Madrimov o‘ziga tegishli Butunjahon boks assotsiatsiyasi (WBA) kamari hamda birinchi o‘rta vaznda vakant, Butunjahon boks tashkiloti (WBO) kamari uchun ayni vaqtda dunyoning eng yaxshi bokschilaridan biri bo‘lib turgan Terens Krouford bilan jang qilib, raqibiga munosib qarshilik ko‘rsatdi va ko‘p jihatlarda amerikalik boks yulduzidan ustunlikni ham tortib oldi, biroq yakunda Amerika hamda kanadalik hakamlar 36 yoshli Kroufordning g‘alabasini qayd etdi.

Isroil Madrimovga ko‘ra, Krouford bu vaznda kamarga da’vogar bokschi edi, shuning uchun Terens jangda kattaroq ustunlik bilan g‘alaba qozonishi kerak bo‘lgan, ammo Krouford jangda yaqqol ustunlik bilan g‘alabaga erishmagan bo‘lsa ham yakunda uning qo‘li yuqoriga ko‘tarildi.

“Kamida durang qayd etilishi kerak edi. Promouterim Eddi Xirn aytganidek chempiondan kamarni tortib olish uchun, yaqqol ustunlik bilan yutish kerak bo‘ladi, biroq Krouford bilan bahsda ustunlik ko‘proq men tomonda bo‘ldi. Bu mavzu hamon boks mutaxassislariyu, ijtimoiy tarmoqlarda hamon muhokama bo‘lmoqda. Bu jang men uchun baribir g‘alabaga teng”, deydi Madrimov. 

Jang hamon munozaralarga sabab bo‘layotgani, boz ustiga Krouford bahsli qaror bilan g‘alaba qozongani uchun revansh jangi tashkil etilishi mumkin.

“Hozir biroz vaqt o‘tishini kutamiz. Boshqa versiyalar bo‘yicha ham jang o‘tkazish imkoniyatiga egaman. Ikkala bokschining ham rejalariga qarab tomonlar bir qarorga keladi. Hozir menejerlarim revansh masalasida ham ish olib bormoqda. Kroufordga qarshi jangda qatnashib, ko‘pchilikning e’tiboriga tushganim uchun keyingi jangim ham nufuzli boks turnirida o‘tkazilishi ehtimoli yuqori”, deydi o‘zbekistonlik bokschi. 

Garchi mag‘lubiyatga uchragan bo‘lsa ham jangdan 750 ming dollar foyda ko‘rgan Isroil Madrimov O‘zbekistonda munosib kutib olinishi barobarida Toshkent shahridan yangi xonadonga ham ega bo‘ldi.

Madrimov keyingi o‘yinni qachon va kimga qarshi o‘tkazadi? Bu savollarga tez orada javob olinadi. Sportchining o‘zi aytishicha, keyingi jang yana kamar uchun faqat WBA emas, balki boshqa yo‘nalishda jahon chempionligi yo‘lida o‘tkazilishi mumkin.