O‘tgan mavsumning eng ko‘p daromad qilgan klubi e’lon qilindi

Madridning “Real” klubi 1 milliard yevrodan ortiq daromad olgan birinchi futbol klubiga aylandi. Klubning 2023/24 yilgi mavsumdagi moliyaviy muvaffaqiyati “Santyago Bernabeu”ni modernizatsiya qilish bilan bog‘liq bo‘lib, yangilangan stadion klub daromadini ikki barobarga oshirish imkonini berdi. Bu haqda “Deloitte Football Money League” reytingida ma’lum qilindi.

Reytingda 2023/24 yilgi mavsumda eng ko‘p daromad olgan 20 ta futbol klubi keltirildi. Umuman olganda, reyting ishtirokchilari rekord darajadagi 11,2 milliard yevro ishlab oldi, bu o‘tgan mavsumdagi 10,5 milliard yevrodan 6 foizga ko‘p.

Reytingning yuqori pog‘onasida “Real Madrid” joylashdi. Klubning 2023/24 yilgi mavsumdagi daromadi 1,045 milliard yevroni tashkil qildi.

Ma’lum bo‘lishicha, Madrid klubining moliyaviy muvaffaqiyatiga “Santyago Bernabeu” stadionini rekonstruksiya qilish ishlari yakunlangani sabab bo‘lgan. Bu o‘yin kunlari daromadlarining sezilarli o‘sishiga yordam bergan va klub o‘tgan yilga nisbatan 248 million yevro ko‘proq daromad qildi. 

Bu o‘sishga asosan 76 million yevroga yaqin daromad keltirgan shaxsiy o‘rindiqlar litsenziyalarini sotish, shuningdek, yangi VIP o‘rindiqlarni sotish va 2023 yil dekabridan stadion sig‘imini oshirish hisobiga erishilgan. Klub, shuningdek, tovarlar savdosining ko‘payishi va yangi homiylik shartnomasi tufayli tijorat daromadlarini 20 foizga (403 million yevrodan 482 million yevrogacha) o‘stira oldi.