Ukrainaga Tomahawk raketalari yetkazilish ehtimoli past – OAV

AQSH Ukrainaga 2,5 ming kilometrgacha uchuvchi Tomahawk qanotli raketalarini yetkazib berish ehtimoli juda past. Bu haqda “Reuters” xabar berdi.

Nashrning yozishicha, Tomahawk’larning mavjud zaxiralari AQSH Harbiy-dengiz kuchlariga mo‘ljallangan va ular ko‘pincha yer ustida kechadigan hujumlarda ishlatiladi. Rasmiy shaxslar yetarli miqdorda Tomahawk tanqisligi yo‘qligini aytgan, lekin Kiyevga ehtimoliy yetkazib beriladigan qurollar orasida masofasi qisqaroq boshqa tizimlar ko‘proq ko‘rib chiqilishi mumkin. Bu esa AQSH Tomahawk yetkazib berishni xohlamayotganini ko‘rsatadi. 

AQSH vakili shuningdek, Yevropa ittifoqchilariga boshqa uzoq masofali qurollarni sotib olib, keyin ularni Ukrainaga o‘tkazishga ruxsat berish variantini ham ko‘rib chiqish mumkinligini aytgan.

AQSH vitse-prezidenti Jey Di Vens yaqinda Tomahawk’larni Ukrainaga yetkazib berish masalasini muhokama qilganini aytgandi, ammo yakuniy qaror Prezident Donald Trampga bog‘liq ekani ta’kidlangan. 

Kreml matbuot kotibi Dmitriy Peskov Tomahawk yetkazilishi Ukraina va Rossiya munosabatlariga jiddiy ta’sir ko‘rsatishi mumkinligini aytgan, biroq u Kiyevga berilishi mumkin bo‘lgan hech qanday qurol jang maydonidagi kuch muvozanatini keskin o‘zgartirmaydi, deb hisoblagan.

Prezident Vladimir Putin ham ilgari Tomahawk kabi raketalar Ukrainaga yetkazilsa, Rossiya ularni urib tushirishga tayyorligini va bunday yetkazib berish Moskva va Vashington munosabatlarini yanada sovuqlashtirishini aytgan.

Ma’lumot uchun, Tomahawk – komanda punktlari, radarlar, SAM (havo mudofaa) tizimlari, havo maydonchalari va boshqa ob’ektlarni nishonga oluvchi ko‘p maqsadli qanotli raketa. U 1970 yillarda ishlab chiqilgan. Uning tezligi taxminan 885 km/soat, masofasi esa 1 250–2 500 kilometrgacha baholanadi.

Eslatib o‘tamiz, avvalroq AQSH Ukrainaga Rossiya hududining chuqur qismiga zarbalar berish uchun zarur bo‘lgan razvedka ma’lumotlarini taqdim etishi haqida xabar berilgandi. Prezident Donald Tramp AQSH razvedka xizmatlari va Pentagonga Kiyevga bu yo‘nalishda yordam berishga ruxsat bergan.