Украинага Tomahawk ракеталари етказилиш эҳтимоли паст – ОАВ

АҚШ Украинага 2,5 минг километргача учувчи Tomahawk қанотли ракеталарини етказиб бериш эҳтимоли жуда паст. Бу ҳақда “Reuters” хабар берди.

Нашрнинг ёзишича, Tomahawk’ларнинг мавжуд захиралари АҚШ Ҳарбий-денгиз кучларига мўлжалланган ва улар кўпинча ер устида кечадиган ҳужумларда ишлатилади. Расмий шахслар етарли миқдорда Tomahawk танқислиги йўқлигини айтган, лекин Киевга эҳтимолий етказиб бериладиган қуроллар орасида масофаси қисқароқ бошқа тизимлар кўпроқ кўриб чиқилиши мумкин. Бу эса АҚШ Tomahawk етказиб беришни хоҳламаётганини кўрсатади. 

АҚШ вакили шунингдек, Европа иттифоқчиларига бошқа узоқ масофали қуролларни сотиб олиб, кейин уларни Украинага ўтказишга рухсат бериш вариантини ҳам кўриб чиқиш мумкинлигини айтган.

АҚШ вице-президенти Жей Ди Вэнс яқинда Tomahawk’ларни Украинага етказиб бериш масаласини муҳокама қилганини айтганди, аммо якуний қарор Президент Дональд Трампга боғлиқ экани таъкидланган. 

Кремль матбуот котиби Дмитрий Песков Tomahawk етказилиши Украина ва Россия муносабатларига жиддий таъсир кўрсатиши мумкинлигини айтган, бироқ у Киевга берилиши мумкин бўлган ҳеч қандай қурол жанг майдонидаги куч мувозанатини кескин ўзгартирмайди, деб ҳисоблаган.

Президент Владимир Путин ҳам илгари Tomahawk каби ракеталар Украинага етказилса, Россия уларни уриб туширишга тайёрлигини ва бундай етказиб бериш Москва ва Вашингтон муносабатларини янада совуқлаштиришини айтган.

Маълумот учун, Tomahawk – команда пунктлари, радарлар, SAM (ҳаво мудофаа) тизимлари, ҳаво майдончалари ва бошқа объектларни нишонга олувчи кўп мақсадли қанотли ракета. У 1970 йилларда ишлаб чиқилган. Унинг тезлиги тахминан 885 км/соат, масофаси эса 1 250–2 500 километргача баҳоланади.

Эслатиб ўтамиз, аввалроқ АҚШ Украинага Россия ҳудудининг чуқур қисмига зарбалар бериш учун зарур бўлган разведка маълумотларини тақдим этиши ҳақида хабар берилганди. Президент Дональд Трамп АҚШ разведка хизматлари ва Пентагонга Киевга бу йўналишда ёрдам беришга рухсат берган.