Ukraina yaqinda Kurskda KXDR harbiylarini yo‘q qiladi –ISW

Shimoliy Koreya aprel oyi o‘rtalariga qadar Kursk viloyatida Rossiya tomonidagi janglarda butun harbiy kontingentini yo‘qotishi mumkin. Bu haqda Amerika urushni o‘rganish instituti (ISW) Ukraina va Janubiy Koreya razvedkasi ma’lumotlariga tayanib xabar berdi. 

Janubiy Koreya razvedkasi va Pentagon ma’lumotlariga ko‘ra, Pxenyan oktyabr oyida Kursk viloyatiga 10-12 ming askar yuborgan va bir oy o‘tib ular Ukraina Qurolli kuchlari bilan ilk janglarga kirishgan. Yanvar oyi boshida Janubiy Koreya razvedkasi hisob-kitoblariga ko‘ra, KXDRning 300 nafar askari halok bo‘lgan, yana 2700 nafari yaralangan.

Ukraina Prezidenti Vladimir Zelenskiy bundan ham ko‘proq – 3800 nafar harbiy xizmatchi halok bo‘lgan yoki yaralanganini aytdi. Shunday qilib, ISW tahlilchilarining hisob-kitoblariga ko‘ra, shimoliy koreyaliklar kuniga 92 kishini yo‘qotishi mumkin. Bu butun guruh yana 12 hafta davom etishini anglatadi. Biroq yaralangan Shimoliy Koreya askarlarining frontga qaytishi noma’lum.

Yuqori yo‘qotishlar sabablari

Janubiy Koreya razvedkasi KXDR harbiylarining katta yo‘qotishlarini “zamonaviy urush usullarini tushunmaslik”, shuningdek, Ukraina Qurolli kuchlari tomonidan qo‘lga olingan Kursk viloyatidagi shimoliy koreyalik askarlarga agar xavf ostida qolgan bo‘lsa, o‘z joniga qasd qilish buyurilgani bilan izohladi. 11 yanvar kuni Zelenskiy Ukraina harbiylari KXDRning birinchi askarlarini tiriklayin qo‘lga olishga muvaffaq bo‘lganini aytdi.

Shundan so‘ng Ukraina Prezidenti Shimoliy Koreya yetakchisi Kim Chen Inga harbiy asirlarni Rossiya asirligidagi Ukraina Qurolli kuchlari askarlariga almashtirishni taklif qildi. 

“Shimoliy Koreyadan qaytib kelishni istamagan askarlar uchun, xususan, bu urush haqida koreys tilida haqiqatni tarqatish orqali tinchlikni yaqinlashtirish istagini bildirgan koreyslar uchun boshqa yo‘llar bo‘lishi mumkin”, dedi Zelenskiy.

Eslatib o‘tamiz, avvalroq Ukraina askarlari janglar davom etayotgan Rossiyaning Kursk viloyatida 2 nafar Shimoliy Koreya askarini asirga olgandi. Zelenskiy e’lon qilgan videoda Shimoliy Koreyadagi ikki harbiy asirning so‘roq qilinayotgani aks etgan: biri karavotda yotgan, ikkinchisining jag‘i bog‘langan. Erkaklardan biri tarjimon orqali Ukrainada jang qilishini bilmaganini va uning qo‘mondonlari “bu shunchaki mashg‘ulot bo‘lganini aytishganini” ma’lum qilgan. Tarjimada, taxmin qilingan askarlardan biri KXDRga qaytishni xohlayotganini bildirgan. Yana biri aytilgan hamma narsani qilishini, biroq imkoniyat tug‘ilsa, Ukrainada qolishni istashini aytgan. Ukraina Prezidenti, asirlardan biriga tegishli bo‘lgan harbiy guvohnoma fotosuratini ham chop etgan. Hujjat Rossiyaning Tuva hududida 1998 yilda tug‘ilgan Aranzin ismli askarniki ekani ko‘rinadi.