Ukraina Rossiya uchirgan 20 ta dron va ikkita qanotli raketani urib tushirdi

Bugun, 13 iyul kuni Ukraina milliy havo kuchlari Rossiyaning 20 ta hujumchi uchuvchisiz samolyotlari va ikkita qanotli raketasini urib tushirdi. Bu haqda Ukraina Harbiy-havo kuchlari matbuot kotibi Yuriy Ignat ma’lum qildi.

“Biz havo hujumidan mudofaa operatsiyasini muvaffaqiyatli amalga oshirdik. Yigirmata Shahed yo‘q qilindi. Kelgan hamma narsa otib tashlandi”, degan Yuriy Ignat milliy televideniyedagi chiqishida.

Ukraina Harbiy-havo kuchlarining Telegram’da e’lon qilingan alohida bayonotiga ko‘ra, Eronda ishlab chiqarilgan 20 ta Shahed hujumchi dronlari “asosan Kiyev viloyatida” yo‘q qilingan.

Tungi hujum oqibatida Kiyevda bir kishi halok bo‘lgan va kamida to‘rt kishi yaralangan. Kiyev harbiy ma’muriyatining bildirishicha, dronlar poytaxtga turli yo‘nalishlardan uchib kelgan. Havo hujumidan mudofaa kuchlari shahar havo hududida o‘nga yaqin dronlarni yo‘q qilgan. 

Xabarda aytilishicha, shaharning besh tumanida dron qoldiqlari qulagan. Buning oqibatida 19 yoshli qiz va 23 yoshli yigit yaralanib, shifoxonaga yotqizilgan. Darnitskiy tumanida ham ikki kishi dron qulashi oqibatida tan jarohati olgan.