Ukraina Kurskda ikki shimoliy koreyalik askarni asirga oldi

Ukraina askarlari janglar davom etayotgan Rossiyaning Kursk viloyatida 2 nafar Shimoliy Koreya askarini asirga oldi. Bu haqda Ukraina Prezidenti Vladimir Zelenskiy ma’lum qildi.

"Bu ikki askar, garchi yarador bo‘lsa-da, tirik qolgan, Kiyevga olib ketilgan va  Ukraina xavfsizlik xizmati tergovchilari bilan aloqada. Bu vazifa oson emas edi: odatda rossiyaliklar va Shimoliy Koreyaning boshqa harbiy xizmatchilari yaradorlarini o‘ldirishadi va Ukrainaga qarshi urushda boshqa davlat – Shimoliy Koreyaning ishtiroki haqida hech qanday dalil saqlanib qolmasligi uchun hamma narsani qilishadi", dedi Zelenskiy.

Shuningdek, Zelenskiy Ukraina Qurolli Kuchlari Maxsus operatsiyalar kuchlarining 84-sonli taktik guruhi askarlari va shimoliy koreyalik ikki insonni qo‘lga olgan desantchilarga minnatdorlik bildirgan. Uning qo‘shimcha qilinishicha, Ukraina tomonidan boshqalar kabi Shimoliy Koreyadan borgan bu ikki askarga ham zarur tibbiy yordam ko‘rsatilmoqda.

"Ukraina Xavfsizlik xizmatiga jurnalistlarga ushbu mahbuslar bilan tanishish imkoniyatini berishni topshirdim. Dunyo nima bo‘layotganini bilishi kerak", dedi Zelenskiy.

Ukraina Prezidenti, asirlardan biriga tegishli bo‘lgan harbiy guvohnoma fotosuratini ham chop etgan. Hujjat Rossiyaning Tuva hududida 1998 yilda tug‘ilgan Aranzin ismli askarniki ekani ko‘rinadi.

Eslatib o‘tamiz, avvalroq Zelenskiy Moskva tomonida Rossiyaning Ukrainaga qarshi urushida qatnashgan va Ukraina Maxsus operatsiya qo‘shinlari tomonidan asirga olingan Shimoliy Koreya askarlarining barchasi olgan jarohatlari tufayli vafot etganini aytgandi. Zelenskiyning so‘zlariga ko‘ra, Rossiya tomonidan Kursk viloyatiga joylashtirilgan Shimoliy Koreya askarlari ko‘p yo‘qotishlarga ega. Shu bilan birga, Rossiya harbiylari va Shimoliy Koreya gvardiyasi KXDRning asirga tushgan askarlarining omon qolishidan umuman manfaatdor emas.