Ukraina AQSHdan qachon Abrams tanklarini olishi aytildi

Ukraina Qurolli kuchlari AQSHning 31 ta M1 Abrams tankidan dastlabki 10 tasini sentyabr oyi o‘rtalarida olishi mumkin. Bu haqda kecha, 31 avgust kuni Pentagondagi manbalariga tayanib, “Politico” gazetasi xabar berdi.

Qayd etilishicha, hozirda tanklar Germaniyada bo‘lib, u yerdan ta’mirlash ishlari tugagandan so‘ng Ukrainaga jo‘natiladi. 

“Qo‘shma Shtatlar kuzgacha Ukrainaga 31 ta tank yetkazib berishni tezlashtirish niyatida”, deydi AQSH armiyasining Yevropa va Afrikadagi qo‘mondonligi matbuot kotibi Martin O’Donnell.

Uning qo‘shimcha qilishicha, Ukraina Qurolli kuchlarining 200 nafar askari Germaniyadagi Amerika o‘quv bazalarida M1 Abrams’ni boshqarish bo‘yicha o‘qitilgan. 

“Tanklar jangga tayyor bo‘lgunga qadar ular (askarlar) Gravenfortda o‘rgangan ko‘nikmalarini saqlab qolish uchun harakat qilmoqdalar”, deydi O’Donnell.

Eslatib o‘tamiz, joriy yilning 20 avgust kuni Ukraina Prezidenti Vladimir Zelenskiy Amsterdam bilan Kiyevga 42 ta F-16 qiruvchi samolyotlarini yetkazib berish bo‘yicha kelishuvga erishgandi. Daniya ham Ukrainaga 19 ta F-16 qiruvchi samolyotini topshirishga tayyorligini bildirdi. Birinchi oltita samolyot shu yilning oxirigacha yetib keladi.