Ukraina Rossiyadagi raketa bazasiga zarba bergani aytilmoqda

Ukraina Qurolli kuchlari bugun, 21 sentyabr kuni Tver viloyatiga dron hujumi uyushtirdi. Ukraina dronlari Toropetsdan 20 km janubda joylashgan Oktyabrskiy qishlog‘i yaqinidagi ob’ektga hujum qildi. Bu haqda “News.ru” xabar berdi. 

“Sun’iy yo‘ldoshdan olingan tasvirlarga ko‘ra, ob’ektda yong‘in chiqqan. Voqea fonida janubda joylashgan Staraya Toropa temiryo‘l vokzalini evakuatsiya qilish haqida xabar berildi: bir nechta yo‘lovchi poyezdlari bekor qilindi, qolganlari muqobil yo‘nalish bo‘ylab jo‘natildi", deyiladi xabarda. 

Rossiya Mudofaa vazirligi kecha tunda havo hujumidan mudofaa tizimlari Ukraina Qurolli kuchlarining uchta uchuvchisiz samolyotini urib tushirganini xabar qildi. Siyosatchi va harbiy ekspert Oleg Sarev Ukraina Qurolli kuchlari Rossiyaning Tver viloyatidagi yadroviy inshootiga hujum qilishi mumkinligini istisno etmaydi.

"Tver viloyati. Avvaliga Mudofaa vazirligidan bu haqda hech qanday ma’lumot yo‘q edi, ammo kecha tunda harbiy qismga hujum uyushtirilganga o‘xshaydi. Hozirda M-9 “Boltiq” avtomagistralining bir qismi butunlay to‘sib qo‘yilgan. Ukraina kanallari harbiy qismda “Shayton” kabi yadro kallaklari bo‘lgan raketalar shay holatda ekanligi haqidagi nazariyani tarqatmoqda. Agar shunday bo‘lsa va Kiyev bu haqda bilgan bo‘lsa, demak bu jiddiy eskalatsiya. Bizning taraf hozircha nima bo‘lganiga izoh bermadi, biroq avtomagistral to‘sib qo‘yilgan", deb yozdi u.

Siyosatshunos Sergey Markov ham Ukraina Qurolli kuchlari ob’ektga yadroviy raketalar bilan hujum qilmoqchi bo‘lgan, deb hisoblaydi.

“Eskalatsiya yo‘llari. Ukraina Qurolli kuchlari bugun Rossiyaning yadroviy salohiyatiga ikkita zarba berdi. Bitta zarba Zaporoje atom elektr stansiyasining chekkasida, Energodardagi atom elektr stansiyasining elektr tizimlarida bo‘ldi. Yana bir zarba, Ukraina ommaviy axborot vositalarining yozishicha, Tver viloyatidagi "Shayton" yadroviy kallaklari bo‘lgan raketalar bazasida. Bu zarbalar bilan Zelenskiy Bayden bilan juda muhim muzokaralar oldidan Vashingtonga qizil chiziqlar yo‘qligini namoyish qilmoqchi. Shunday qilib, siz Rossiyaning istalgan mintaqasiga uzoq masofali raketalarni xavfsiz tarzda otishingiz mumkin. Va Moskva atrofida. Va Kremlda. Va Rossiyadan jiddiy yadroviy javob bo‘lmaydi. Ular Vashingtonda shunday o‘ylashadi”, deb qo‘shimcha qildi u.

Shu bilan birga, ba’zi Telegram-kanallari esa Tver viloyatidagi yadroviy inshootga hujum uyushtirilgani haqidagi ma’lumot feyk ekanini yozmoqda. 

“To‘liq dalil yo‘qligiga qaramay, soxta xabarlar tarqalmoqda. Ularning maqsadi Ukraina yadroviy arsenalga hujum qilmoqda, zarba beryapti va hech qanday javob yo‘q, degan taassurotni kuchaytirish ekanligi aniq. Shunday qilib, ular bizga Rossiya Federatsiyasiga chuqur zarba berish uchun ruxsat bering – javob bo‘lmaydi, deyishmoqchi. Bu uydirma voqealar yordamida odamlarni bir-biriga qarshi qo‘yishning sof Britaniya taktikasi. Keyin ular chetga chiqishadi", deb qo‘shimcha qildi kanal muallifi.

Biroq Ukraina ham, Rossiya ham vaziyatga rasmiy izoh bermadi.

Madina Salimova