Uilyam Saliba uzoq muddatga safdan chiqdi – OAV

Fransiya terma jamoasi va Londonning “Arsenal” klubi himoyachisi Uilyam Saliba 2026 yilgi Jahon chempionatida olgan jarohati tufayli uzoq muddat maydondan chetda qoladi. Bu haqda “L’Équipe” nashri xabar berdi.

Manba ma’lumotiga ko‘ra, fransiyalik futbolchi jarrohlik amaliyotini boshdan kechiradi. Uning tiklanish jarayoni 4–5 oy davom etishi kutilmoqda va shu sababli Saliba 2027 yil boshigacha rasmiy uchrashuvlarda ishtirok eta olmaydi.

Klub miqyosida Uilyam Saliba Angliyaning “Arsenal” klubi sharafini himoya qiladi. O‘tgan mavsumda u Angliya Premer-ligasida 31 ta uchrashuvda maydonga tushib, 1 ta gol urdi va 2 ta sariq kartochka oldi. Shuningdek, u “kanonirlar” safida Angliya Premer-ligasi chempionligini qo‘lga kiritdi.

Eslatib o‘tamiz, Saliba Jahon chempionatining yarim finalida Ispaniyaga qarshi kechgan va Fransiyaning 0:2 hisobidagi mag‘lubiyati bilan yakunlangan uchrashuvda jarohat olgan edi.