UFC jangchisi vazn o‘lchash marosimida hushidan ketdi (video)

Kecha, 23 yanvar kuni UFC jangchisi, amerikalik Kemeron Smoterman Las-Vegasda bo‘lib o‘tadigan UFC 324 musobaqasi oldidan vazn o‘lchash marosimida hushidan ketdi. Bu haqda ESPN xabar berdi. 

Ma’lumotlarga ko‘ra, yengil vazn toifasida ishtirok etuvchi Smoterman vazn me’yorini bajargan, biroq tarozida turgan paytda yiqilib tushgan. Amerikalik jangchiga darhol tibbiy yordam ko‘rsatilgan va u hushiga keltirilgan.

“Xo‘p, men juda ko‘p xabarlar oldim va menga bo‘lgan samimiy tashvish uchun hammangizga rahmat aytaman. Men butunlay yaxshiman, hammasi joyida. To‘g‘risi, nima bo‘lganini aniq bilmayman. Internetda ko‘p odamlar bu haddan tashqari ko‘p vazn tushirish oqibati deyishyapti, lekin bu jang uchun men deyarli vazn tushirmadim. Hatto shu hafta davomida ham ko‘p vazn tashlamadim. Nima bo‘lganini aniq bilmayman, oldinda masalaning asl sababini aniqlash uchun yana tekshiruvlar va tahlillar bor. Men to‘liq yaxshiman va umid qilamanki, tez orada qaytaman. Raqibimdan uzr so‘rayman”, deydi Smoterman.

Ma’lumot uchun, 28 yoshli Smoterman aralash jang san’ati (MMA) bo‘yicha 12 ta g‘alaba va 6 ta mag‘lubiyatdan iborat ko‘rsatkichga ega. U bugun, 24 yanvar kuni UFC 324 turnirida rossiyalik jangchi Rikki Tursiosga qarshi oktagonga chiqishi rejalashtirilgan edi.