Turkmaniston qurol importini keskin oshirgani ma’lum bo‘ldi

Turkmaniston joriy yilda qurol importini sezilarli darajada oshirdi. Bu haqda Avstraliya Iqtisodiyot va tinchlik instituti tomonidan tuzilgan dunyo mamlakatlarining tinchlik yillik reytingida ma’lum qilingan.

Qayd etilishicha, eng ko‘p qurol importi Armaniston, Turkmaniston va Qatar davlatlari tomonidan amalga oshirilgan. Tadqiqotlarga ko‘ra, 163 mamlakatning 92 tasida qurol importi ko‘rsatkichi oshgan. O‘rtacha o‘sish 4 foizni tashkil etadi. 

Joriy yildagi qurol-yarog‘ importi bo‘yicha ko‘rsatkichi butun dunyoda sezilarli darajada oshgan (va eng katta yaxshilanish – terrorizm tarqalishida, u o‘rtacha 7 foizga kamaydi). Biroq, tadqiqotchilarning ta’kidlashicha, dunyoda eng ko‘p qurol importi 2012 yilda bo‘lgan.

Shu bilan birga, Turkmaniston fuqarolari eng kam zo‘ravonlikka uchragan mamlakat sifatida qayd etilgan. Bu ko‘rsatkich 1 foizni tashkil qiladi. Ushbu ro‘yxatda oxiridan ikkinchi o‘rinni O‘zbekiston va Yaponiya 3,1 foiz ko‘rsatkich bilan, uchinchi o‘rinni 4 foiz ko‘rsatkich bilan Singapur egallab turibdi. 

Xabarga ko‘ra, tadqiqotchilar Turkmanistondagi jinoyatchilik darajasi to‘g‘risidagi ma’lumotlarni qayerdan olgani noma’lumligicha qolmoqda. Mamlakat rasmiylari bunday statistikani e’lon qilmaydi, rasmiy ommaviy axborot vositalari hatto alohida jinoyatlar haqida ham xabar bermaydi.

Ma’lumot uchun, Turkmaniston tinchlik reytingida 2 154 ball to‘plagan holda 109-o‘rinni egalladi (qancha ball to‘plasa, tajovuz darajasi shuncha yuqori bo‘ladi). Bu Markaziy Osiyodagi barcha mamlakatlar uchun eng yomon natijadir: Tojikiston 2 095 ball bilan 97-o‘rinda, O‘zbekiston 2 062 ball bilan 90-o‘rinda, Qirg‘iziston 1 998 ball bilan 76-o‘rinda, Qozog‘iston 1 936 ball bilan 67-o‘rinda. Rossiya 2 993 ball bilan 154-o‘rinni, AQSH 2 337 ball bilan 122-o‘rinni egalladi. Oxirgi o‘rin 3 631 ball bilan Afg‘onistonga nasib etdi. Islandiya esa 1,1 ball bilan dunyoning eng tinch davlati deb tan olindi.