Turkiyada dahshatli YTH oqibatida 10 kishi halok bo‘ldi

Turkiya shimoli-g‘arbida yettita avtomobil ishtirokida sodir bo‘lgan YTHda 10 kishi halok bo‘ldi, 59 kishi jarohatlandi. Bu haqda “TRT Haber” ma’lum qildi. 

Xabarlarga ko‘ra, avariya kuchli tuman tufayli sodir bo‘lgan. Sakarya gubernatori Yashar Karadeniz jabrlanganlar 10 ta shifoxonada davolanayotganini aytgan.

“Ehtimol, hammasi mashina yuk mashinasi bilan to‘qnashuvdan boshlangan. Keyin unga boshqa mashinalar kelib urilgan. Shunga qaramay, dastlabki dalillar shuni ko‘rsatadiki, o‘lganlarning ba’zilari mashinadan tushayotgan piyodalarga yaqinlashib kelayotgan boshqa transport vositasi tomonidan urib yuborilgan bo‘lishi mumkin. Ayni damda bu birinchi taxminlar va hal qiluvchi xulosani voqea joyini o‘rganayotgan mutaxassislar va bizning prokurorlarimiz chiqaradi”, deydi Yashar Karadeniz.

Sakarya shahar bosh prokuraturasining ma’lum qilishicha, nazorat organi YTHda ishtirok etgan yettita transport vositasi, jumladan, uchta avtobus va bitta yuk mashinasi haydovchilarini hibsga olish uchun order bergan. Olti nafar haydovchi allaqachon hibsga olingan. Shifoxonaga yotqizilgan jarohatlangan haydovchilardan biri tibbiy yordamdan so‘ng qamoqqa olinadi.

Mamlakat Sog‘liqni saqlash vaziri Fahrettin Koja hodisa oqibatida jarohatlangan 59 kishidan 8 nafarining ahvoli og‘ir ekanini ma’lum qilgan.

Hududda kuchli tuman davom etmoqda va shu munosabat bilan Ichki ishlar vaziri Ali Yerlikaya haydovchilarni o‘ta ehtiyotkor bo‘lishga chaqirgan.