Turkiya Turkmanistondan gaz olib uni Yevropaga sotish ustida ishlamoqda

Turkiyaning “Bota” neft-gaz kompaniyasi va “Türkmengaz” davlat korporatsiyasi rahbariyati vakillari Turkmaniston gazini Yevropaga eksport qilish uchun Turkiyaga yetkazib berish rejalarini muhokama qildi. Uchrashuv “Bota” kompaniyasining Anqaradagi qarorgohida bo‘lib o‘tgan. Bu haqda “Sabah” gazetasi yozdi. 

Qayd etilishicha, Ashxobod bilan bu sohadagi hamkorlik Turkiyaning mintaqaviy gaz savdo markaziga aylanish strategik rejalarining tarkibiy qismlaridan biridir. Turkman gazi respublikaga Ozarbayjon orqali yetkaziladi, gaz hajmining bir qismi esa keyinchalik Yevropaga eksport qilinadi. Ikki davlat o‘rtasida energetika sohasida hamkorlikni rivojlantirish bo‘yicha memorandum 2022 yil dekabr oyida imzolangan edi. 

“Bota” rahbariyati, gazeta ta’kidlaganidek, Turkmaniston tomoniga ushbu rejalarni amalga oshirish uchun har qanday yordam ko‘rsatishga tayyorligiga ishontirgan. Tomonlar o‘rtasida muhokama qilingan rejaning birinchi bosqichi turkman gazini Turkiyaga yetkazib berishni nazarda tutadi, so‘ngra qisqa muddatda Yevropa bozorlariga muntazam eksport qilinadi. Turkmaniston gazining taxminiy narxi Turkiya uchun foydaliroq ekani, bu boshqa eksport qiluvchi davlatlar bilan muzokaralarda o‘z pozitsiyasini mustahkamlashi qayd etilgan. 

“Sabah” gazetasi, Turkiyaning yirik gaz eksport markaziga aylanish rejalari doirasida Rossiyadan tashqari Ozarbayjon va Turkmanistondan ham gaz olishni, boshqa davlatlardan suyultirilgan gaz olib, bu yoqilg‘ini Yevropaga eksport qilishni rejalashtirganini yozmoqda. 

Avvalroq Turkiya rahbariyati mamlakatda ham gaz eksport markazi, ham gaz va energiya resurslari savdosi bo‘yicha bog‘langan markaz, ya’ni resurslarning joriy narxi shakllantiriladigan birja platformasini yaratishni rejalashtirayotganini bir necha bor ta’kidlagan edi. Buning uchun Anqara o‘z hududiga turli manbalardan yoqilg‘i yetkazib berilishini ta’minlashi kerak. Rossiya bilan ham gaz xabi bo‘yicha muzokaralar davom etmoqda.