Turkiya muxolifati muddatidan oldin saylov uchun imzo to‘plashni boshladi 

Turkiya muxolifati respublikada muddatidan oldin prezidentlik saylovlari o‘tkazilishini qo‘llab-quvvatlovchi imzo to‘plash kampaniyasini boshladi. Kampaniya boshlanishi haqida kecha, 29 mart kuni Istanbulda bo‘lib o‘tgan mitingda Jumhuriyat Xalq partiyasi (JXP) rahbari O‘zg‘ur O‘zel e’lon qildi.

“Biz [prezidentlikka] nomzodimiz, hokim Ekremning ozod etilishi va saylovlar o‘tkazilishini talab qilib, imzo to‘plash kampaniyasini boshlayapmiz”, dedi siyosatchi.

Kampaniya hibsga olingan Istanbul hokimi Ekrem Imomo‘g‘li tug‘ilgan Qora dengiz bo‘yidagi Trabzon  viloyatining Akcaabat tumanida boshlandi.

Turkiyada prezidentlik saylovlari 2028-yilga belgilangan, biroq muxolifat muddatidan oldin saylovlar o‘tkazishga harakat qilmoqda. 23 mart kuni JXP prezidentlikka nomzodni aniqlash uchun praymeriz o‘tkazdi. Muxolifat partiyasi yetakchisi Imomo‘g‘li nomzodini 14,8 milliondan ortiq kishi qo‘llab-quvvatlagani haqida xabar berdi.

Imomo‘g‘lu 19 mart kuni korrupsiya va terrorchilarga aloqadorlikda gumonlanib qo‘lga olingan va sud qarori bilan 23 mart kuni hibsga olingan.

O‘tgan hafta Turkiyada norozilik namoyishlari to‘lqini bo‘lib o‘tdi. Ichki ishlar vazirligi ma’lumotlariga ko‘ra, namoyishlar davomida kamida 1800 kishi qo‘lga olingan va shulardan 260 nafari hibsda. Eng yirik namoyishlar Istanbul, Anqara va Izmirda uyushtirildi.