To‘qayev Erdo‘g‘anni mukofotladi

Bugun, 12 oktyabr kuni davlat tashrifi bilan Qozog‘istonga kelgan Turkiya Respublikasi Prezidenti Rajab Toyib Erdo‘g‘an I darajali “Do‘stlik” ordeni bilan taqdirlandi. Marosim chog‘ida Qozog‘iston Prezidenti Qosim-Jomart To‘qayev Turkiya Prezidentini o‘z mamlakatini olg‘a yetaklovchi haqiqiy yetakchi, deb atadi. 

“Konstruktiv siyosatingiz tufayli Turkiyaning dunyodagi nufuzi oshdi. Butun jahon hamjamiyati mamlakatingizni rivojlangan, ulkan salohiyatga ega davlat sifatida hurmat qiladi. Qadim zamonlardan beri Turkiya biz bilan mushtarak ildizlar bilan bog‘langan davlatdir. Siz Qozog‘istonning eng yaqin va ishonchli strategik hamkorisiz”, deydi Qozog‘iston rahbari. 

Qozog‘iston Prezidentining so‘zlariga ko‘ra, Rajab Toyib Erdo‘g‘an ikki xalqni bog‘lovchi qardoshlik rishtalarini mustahkamlashga katta hissa qo‘shmoqda. 

“Men bu hissani yuqori baholayman. Sizning tinimsiz sa’y-harakatlaringiz qardosh mamlakatlarimizni umumiy manfaatlar yo‘lida bir-biriga yaqinlashtirishga qaratilgan. Dastlab kengash sifatida tashkil etilgan va bugungi kunda to‘laqonli tashkilotga aylangan Turkiy davlatlar tashkiloti buning yorqin tasdig‘idir. Bundan tashqari, tinchlikparvarlik borasidagi sa’y-harakatlaringizni alohida ta’kidlamoqchiman. Biz global inqirozlar va mintaqaviy muammolarni hal etish bo‘yicha tashabbuslaringizni qo‘llab-quvvatlaymiz”, deydi Qosim-Jomart To‘qayev. 

U Qozog‘iston Turkiya bilan strategik sheriklikka asoslangan ko‘p qirrali hamkorlikni mustahkamlashdan manfaatdor ekanini ta’kidladi. Qardosh mamlakatlar kelajakka birgalikda qadam tashlayotganini aytdi.  

“Biz abadiy do‘stlik va birodarlik yo‘lidan borishda davom etamiz. Siz Qozog‘iston-Turkiya munosabatlarining izchil rivojlanishiga beqiyos hissa qo‘shyapsiz. Bu sohadagi beqiyos tarixiy xizmatlaringizni inobatga olib, I darajali “Do‘stlik” ordeni bilan taqdirlashga qaror qildim. Bu qaror, shubhasiz, ikki tomonlama munosabatlar yilnomasiga oltin harflar bilan yoziladi. Men bundan buyon ham bor kuch-g‘ayratimni xalqlarimiz do‘stligi va o‘zaro hamjihatligini mustahkamlashga yo‘naltirishga tayyorman”, deydi Prezident.