Trampning odami Myunxenda Yermak bilan uchrashdi

Ukraina Prezidenti devoni rahbari Andrey Yermak kecha, 14 fevral kuni Myunxen xavfsizlik konferensiyasi (MSC) doirasida AQSH Prezidenti Donald Trampning Rossiya va Ukraina bo‘yicha maxsus vakili Kit Kellogg bilan uchrashdi. Bu haqda Ukraina Prezidenti matbuot xizmati xabar berdi.

Bildirilishicha, uchrashuvning asosiy mavzusi “barqaror tinchlikka erishish bo‘yicha ishlarni muvofiqlashtirish” bo‘lgan. Suhbat chog‘ida Yermak Kellogga “Putin hech qachon qoida bo‘yicha o‘ynamas”ligini aytgan va uni “o‘zini aldab qo‘ymaslikka” chaqirgan.

“Ruslar har doim G‘arbni masxara qilishgan, lekin har doim undan nusxa ko‘chirishgan. Ularning hozirgi “Sharqqa burilish”lari chuqur madaniy o‘zgarish emas, balki o‘z maqsadlariga erishish uchun taktik harakatdir. Ruslar faqat kuchni hurmat qiladi va undan foydalanmaydiganlarni mensimaydi. Rossiya va’da berganida emas, majbur bo‘lganda to‘xtaydi”, degan Yermak.

Ukraina Prezidentining veb-saytidagi bayonotda aytilishicha, muzokarachilar Ukrainani qo‘llab-quvvatlashni davom ettirishga alohida e’tibor qaratgan. 

“Rossiyaning kuchli majburlovisiz har qanday kelishuvlar ishlamaydi, chunki Ukraina ustidan nazorat Rossiya Federatsiyasining imperialistik ambitsiyalarining asosidir”, degan Yermak.

Yermak va Kellogg, shuningdek, oliy darajadagi uchrashuvlarga tayyorgarlik ko‘rish va uning Ukrainaga tashrifini muhokama qilgan.

Qayd etish joiz, fevral oyi boshida “Bloomberg” manbalarga tayanib, Kellogg Myunxen xavfsizlik konferensiyasida Trampning Ukrainadagi urushni tugatish rejasini taqdim etishi mumkinligi haqida xabar bergan edi. Keyinchalik Kit Kellogg bu mish-mishlarni rad etdi.

MSC rahbari Kristof Xoysgen “Ukrainada tinchlikka erishish uchun” Myunxendan foydalanishga umid bildirdi. Uning qo‘shimcha qilishicha, konferensiyada Ukraina bo‘yicha aniq tinchlik rejasi taqdim etilmasa ham, uning “konturlari va kelajak parametrlari” belgilab beriladi.