Trampning inauguratsiya uchun rasmiy portreti e’lon qilindi

AQSHning saylangan prezidenti Donald Trampning kampaniyasi X sahifasida uning inauguratsiya portretini e’lon qildi.

 “Qirq yettinchi”, deb yoziladi e’lon qilingan postda.

X foydalanuvchilari ushbu portretni Trampning respublikachi sifatidagi birinchi prezidentlik muddati davrida olingan portreti bilan solishtirgan. Ular yangi suratda Trampning jilmaymayotgani va qiyofasi ancha jiddiy ko‘rinishini ta’kidlagan.

Bundan tashqari, foydalanuvchilar ushbu portretni Janubiy Koreyaning mashhur “Kalmar o‘yini” (“Squid game”) serialidagi bosh qahramon Son Ki Xun obrazi bilan solishtirgan. Ularning qayd etishicha, bosh qahramon serialning birinchi va ikkinchi mavsumlarida “o‘yinlar”ga ikkinchi marta tushganida jilmaymay qo‘ygan va qiyofasi o‘zgargan.

Bu kabi solishtirishlar yangi portretning ijtimoiy tarmoqlarda keng muhokama qilinishiga sabab bo‘lmoqda.

Ma’lumot uchun, Donald Trampning inauguratsiya marosimi joriy yilning 20 yanvar kuni o‘tkaziladi.

Eslatib o‘tamiz, avvalroq Donald Tramp inauguratsiya kuniga qadar 100 dan ortiq farmon tayyorlayotgani va ularni Oq uyga kelishi bilan darhol imzolashni rejalashtirayotgani xabar qilingan edi. Farmonlar xavfsizlikni ta’minlash, migrantlarni deportatsiya qilish va Tramp tomonidan ilgari ko‘rsatilgan boshqa siyosiy ustuvorliklarga bag‘ishlangan. Ularning ko‘plari 20 yanvar kuni inauguratsiya kunida ishga tushishi kutilmoqda.