Trampga qarshi ikkita jinoiy ish to‘xtatildi

AQSH Adliya vazirligining maxsus prokurori Jek Smit suddan mamlakatning saylangan prezidenti Donald Trampga qarshi ishni tugatishni so‘radi. Bu haqda uning o‘zi kecha, 25 noyabr kuni ma’lum qildi.

Prokuror Smit sudya Tanya Chutkanga yuborgan so‘rovida AQSH Konstitutsiyasi saylangan prezidentning inauguratsiyasidan oldin unga qarshi ishni tugatishni talab qilishini tushuntirgan. Chutkan ishni shu kuniyoq rasman to‘xtatgan.

Saylov kampaniyasi vaqtida Donald Tramp Oq uyga qaytishi bilanoq Jek Smitni ishdan bo‘shatishini aytgandi.

Tramp jami to‘rtta jinoiy ish bo‘yicha ayblangan. 25 noyabr kuni ikkita ish yopildi: bular siyosatchining 2020 yilgi prezidentlik saylovlari natijalarini o‘zgartirishga urinishi va maxfiy hujjatlarni saqlashdagi qonunbuzarlik bilan bog‘liq.

Nyu-York va Jorjiya shtatlarida ham Donald Trampga qarshi yana ikkita ish qo‘zg‘atilgan. Birinchisiga ko‘ra, sobiq prezident biznes hujjatlarini qalbakilashtirishda ayblangan. Hakamlar hay’ati uni aybdor deb topgan, shundan so‘ng u qaror ustidan shikoyat qilgan va sudya ishni to‘xtatgan.

Ikkinchi holatda Tramp 2020 yilda Jorjiyadagi prezidentlik saylovlari natijalariga ta’sir ko‘rsatishga urinishda ayblangan.

Bundan tashqari, Donald Trampga nisbatan ikkita fuqarolik ishi qo‘zg‘atilgan. Ular 1990 yillar oxirida sobiq jurnalist Jin Kerrollga nisbatan jinsiy tegajog‘lik qilish va keyinchalik unga tuhmat bilan bog‘liq.

Eslatib o‘tamiz, avvalroq AQSH maxsus prokurori Jek Smit sobiq prezident Donald Trampga 2020 yilgi prezidentlik saylovlarini soxtalashtirishga urinish uchun yangilangan ayblovni e’lon qilgandi. Joriy yilning 26 avgust kuni Jek Smit ham Florida sudining qarori ustidan apellyatsiya bergan edi. U iyul oyida Trampga o‘z mulkida maxfiy hujjatlarni noqonuniy saqlagani uchun ishni rad etdi. Shunda sudya Eylin Kannon Smitning AQSH maxsus maslahatchisi etib tayinlanishini noqonuniy deb topdi. Kannonning o‘zi Tramp prezident bo‘lganida sudya etib tayinlangan.