Tramp Oq uyda iftorlik uyushtirdi

AQSH Prezidenti Donald Tramp Amerika musulmon jamiyati a’zolari va bir qancha musulmon davlatlari diplomatlari uchun iftorlik uyushtirdi.

Oq uyda uyushtirilgan iftorlik Trampning ikkinchi prezidentlik muddatidagi birinchisi bo‘ldi. Davlat rahbari tadbirdagi nutqini “Ramazon oyi muborak” degan tilak bilan boshladi.

Amerika yetakchisi 2024 yil noyabrida bo‘lib o‘tgan prezidentlik saylovlarida Qo‘shma Shtatlardagi musulmonlar unga ko‘rsatgan qo‘llab-quvvatlashdan g‘oyat mamnun ekanini ta’kidladi.

“2024 yilgi prezidentlik saylovlarida rekord darajada qo‘llab-quvvatlagan yuz minglab musulmon amerikaliklarga alohida minnatdorlik bildirmoqchiman. Bu aql bovar qilmaydigan bo‘ldi”, deydi AQSH Prezidenti.

Tramp Oq uy ma’muriyati musulmon jamiyatiga bergan va’dalarini bajarayotganiga ishontirdi.

“Biz tarixiy Ibrohim kelishuvlariga asoslanib, Yaqin Sharqda uzoq muddatli tinchlik o‘rnatish uchun uzluksiz diplomatik ish olib bormoqdamiz”, dedi Prezident.

Davlat rahbari Michigan shtatida istiqomat qilayotgan musulmonlarga alohida minnatdorlik bildirdi. 

“Men Prezident bo‘lib qolsam, siz bilan bo‘laman. Men sizni qo‘llab-quvvatlayman. Buni bilishingizni istayman”, deya ta’kidladi Prezident.

AQSH yetakchisi yanada yorqin va umidli kelajakka erishish uchun musulmonlar bilan hamkorlik qilishni intiqlik bilan kutayotganini qo‘shimcha qildi. U, shuningdek, iftorlikda Saudiya Arabistoni, Misr, BAA, Qatar, Livan, Pokiston va boshqa davlatlardan vakillar ham ishtirok etayotganini aytdi.

Eslatib o‘tamiz, 25 mart kuni O‘zbekiston Respublikasi Prezidenti Shavkat Mirziyoyevning “Ko‘ksaroy” qarorgohida iftorlik tadbirini o‘tkazgandi.