Tramp Bosh prokurorlikka ko‘rsatgan nomzod amaldan bosh tortdi

AQSHning saylangan prezidenti Donald Tramp tomonidan AQSH Adliya vaziri va Bosh prokurori lavozimiga ko‘rsatilgan nomzod, 42 yoshli konservator kongressmen Mett Gets o‘z nomzodini qaytarib oldi. Bu haqda Gets o‘zining X sahifasida ma’lum qildi.

“Kecha senatorlar bilan ajoyib uchrashuvlar o‘tkazdim. Men ularning chuqur fikr-mulohazalarini va ko‘pchilikning ajoyib qo‘llab-quvvatlashini qadrlayman. Vashingtondagi behuda uzoq davom etgan janjalga ortiqcha vaqt yo‘q, shuning uchun men o‘z nomzodimni Bosh prokuror lavozimida ishlash uchun ko‘rib chiqishdan olib tashlayman”, deya yozgan u.

19 noyabr kuni AQSH Kongressida Mett Getsga qarshi ko‘rsatma berilgan. U voyaga yetmagan qiz bilan jinsiy aloqada bo‘lganlikda, shuningdek, ayollarga jinsiy xizmatlar uchun pul to‘laganlikda va giyohvand moddalarni iste’mol qilganlikda ayblanmoqda. Getsga nisbatan avval ham xuddi shunday ayblovlar qo‘yilgan, biroq uning o‘zi ayblovlarni rad etgan edi.

Tramp jamoasi vitse-prezidenti Jeyms Devid Vens oktyabr oyida ABS telekanaliga bergan intervyusida aytganidek, Bosh prokuror lavozimi amaldagi prezidentlikdan keyingi eng muhim lavozim bo‘ladi. Saylov kampaniyasi davomida Tramp muhojirlarni ommaviy deportatsiya qilish, 2021 yil 6 yanvarda Kapitoliyga bostirib kirishda aybdorlar afv etilishi va siyosiy dushmanlar ustidan tergov o‘tkazilishini e’lon qilgandi. Bosh prokuror bu va boshqa loyihalar bilan shug‘ullanadi. Tramp, shuningdek, Adliya vazirligi uning birinchi prezidentlik muddatiga xalaqit berganidan shikoyat qilgandi.

“Utah News Dispatch” ma’lumotlariga ko‘ra, Mett Getsning Adliya vaziri va Bosh prokuror lavozimiga taklif qilinishi juda kutilmagan qaror bo‘lgan, chunki u AQSH Kongressi Vakillar Palatasining Etika qo‘mitasi tomonidan tergov mavzusi bo‘lib qolmoqda. Ayblovlarning aksariyati jinsiy zo‘ravonlik, giyohvand moddalarni noqonuniy iste’mol qilish va qimmatbaho sovg‘alar olish bilan bog‘liq.

Shu bilan birga, Getsning o‘zi qo‘mita tomonidan qo‘yilgan barcha ayblovlarni qat’iyan rad etgan va o‘zini “konservativ fanatik” deb ta’riflagan.

Qo‘mita tergovi 2021 yil aprel oyida boshlangan. Qo‘mita ma’lumotlariga ko‘ra, 2024 yil iyun oyi holatiga ko‘ra, Gets ishi yuzasidan o‘ndan ortiq guvohlar so‘roq qilingan, 25 ta sudga chaqiruv qog‘ozi chiqarilgan va Gets tergoviga oid minglab sahifali hujjatlar ko‘rib chiqilgan. Uning raisi Maykl Gestning 13 noyabr kuni jurnalistlarga aytishicha, AQSH Senati Getsni Bosh prokuror etib tasdiqlagach, qo‘mitaning tergov bo‘yicha yurisdiksiyasi avtomatik ravishda tugashi mumkin edi.

Eslatib o‘tamiz, avvalroq Donald Tramp Bosh prokurorlikka 3 yildan buyon tergov qilinayotgan shaxs nomzodini ilgari surgani haqida xabar berilgandi.