Tramp Bosh prokurorlikka 3 yildan buyon tergov qilinayotgan shaxs nomzodini ilgari surdi

AQSHning saylangan prezidenti Donald Tramp 42 yoshli konservativ kongressmen Mett Getsni AQSH Adliya vazirligi rahbari va mamlakat Bosh prokurori lavozimiga nomzod qilib ko‘rsatdi. Bu haqda Trampning o‘zi kecha, 13 noyabr kuni Truth Social sahifasida ma’lum qildi.

“Mett bizning chegaralarimizni himoya qiladi, jinoiy guruhlarni yo‘q qiladi va amerikaliklarning Adliya vazirligiga bo‘lgan ishonchini qayta tiklaydi”, deb yozadi u.

Tramp jamoasi vitse-prezidenti Jeyms Devid Vens oktyabr oyida ABS telekanaliga bergan intervyusida aytganidek, Bosh prokuror lavozimi amaldagi prezidentlikdan keyingi eng muhim lavozim bo‘ladi. Saylov kampaniyasi davomida Tramp muhojirlarni ommaviy deportatsiya qilish, 2021 yil 6 yanvarda Kapitoliyga bostirib kirishda aybdorlar afv etilishi va siyosiy dushmanlar ustidan tergov o‘tkazilishini e’lon qilgandi. Bosh prokuror bu va boshqa loyihalar bilan shug‘ullanadi. Tramp, shuningdek, Adliya vazirligi uning birinchi prezidentlik muddatiga xalaqit berganidan shikoyat qilgandi.

“Utah News Dispatch” ma’lumotlariga ko‘ra, Mett Getsning Adliya vazirligi va Bosh prokurori lavozimiga taklif qilinishi juda kutilmagan qaror hisoblanadi, chunki u AQSH Kongressi Vakillar Palatasining Etika qo‘mitasi tomonidan tergov mavzusi bo‘lib qolmoqda. Ayblovlarning aksariyati jinsiy zo‘ravonlik, giyohvand moddalarni noqonuniy iste’mol qilish va qimmatbaho sovg‘alar olish bilan bog‘liq.

Shu bilan birga, Getsning o‘zi qo‘mita tomonidan qo‘yilgan barcha ayblovlarni qat’iyan rad etgan va o‘zini “konservativ fanatik” deb ta’riflagan.

Qo‘mita tergovi 2021 yil aprel oyida boshlangan. Qo‘mita ma’lumotlariga ko‘ra, 2024 yil iyun oyi holatiga ko‘ra, Gets ishi yuzasidan o‘ndan ortiq guvohlar so‘roq qilingan, 25 ta sudga chaqiruv qog‘ozi chiqarilgan va Gets tergoviga oid minglab sahifali hujjatlar ko‘rib chiqilgan. Uning raisi Maykl Gestning 13 noyabr kuni jurnalistlarga aytishicha, AQSH Senati Getsni Bosh prokuror etib tasdiqlagach, qo‘mitaning tergov bo‘yicha yurisdiksiyasi avtomatik ravishda tugaydi.

Eslatib o‘tamiz, avvalroq Donald Tramp “Fox News” telekanali boshlovchisi Pit Xegsetni AQSH Mudofaa vaziri lavozimiga nomzod qilib ko‘rsatgandi. Xegset jangovar faxriy, Iroq va Afg‘onistonda xizmat qilgan. O‘zining podkastlaridan birida u Rossiya-Ukraina urushining boshlanishini “menga o‘z urushimni qaytarib bering” prinsipidagi Putinning urushi deb ta’riflagan. U ham Tramp kabi NATOning ayrim a’zolari o‘z mudofaasini ta’minlash uchun kamroq haq to‘lashi sababli alyansni tanqid qilgani ma’lum.