Tramp Harrisni mag‘lub etdi – “Fox News” (video)

“Fox News Decision Desk” loyihasiga ko‘ra, sobiq prezident Donald Tramp vitse-prezident Kamola Harrisni ajoyib raqamlar bilan mag‘lub etdi va Oq uyda ikkinchi muddatga saylandi. Bu haqda o‘z prognozlariga tayanib “Fox News” nashri xabar berdi.

Qayd etilishicha, beqaror shtatlardan bo‘lgan Jorjiya va Pensilvaniya ham Trampga ovoz bergan va u 67 mln 941 ming 98 ovozlar soni bilan 51,2 foziga ega bo‘lgan. Kamola Harrisga esa 62 mln 901 ming 682 ta ovoz berilgan, bu 47,4 foizni tashkil qiladi.    

Biroq bu rasmiy natijalar emas. Amerikaning boshqa ommaviy axborot vositalarida boshqacha natijalar e’lon qilinmoqda. Lekin ularda ham Tramp yetakchilik qilmoqda.

Eslatib o‘tamiz, avvalroq AQSHdagi prezidentlik saylovlari mamlakat tarixidagi eng qimmat saylovga aylangani haqida xabar berilgandi. Demokratik partiyaning Milliy qo‘mitasi va unga aloqador tuzilmalar 2,3 milliard dollardan ortiq mablag‘ to‘plashga erishdi, shundan 1,9 milliard dollari ishlatildi. Respublikachilar esa jalb qilingan 1,8 milliard dollardan 1,6 milliard dollarini saylov kampaniyasini o‘tkazishga yo‘naltirdi.

Tahlillarga ko‘ra, mablag‘larning qariyb yarmi ommaviy axborot vositalari va ijtimoiy tarmoqlarda asosan yettita beqaror shtatda (Arizona, Nevada, Viskonsin, Jorjiya, Shimoliy Karolina, Pensilvaniya va Michigan) reklama uchun yo‘naltirilgan.