Трамп Ҳаррисни мағлуб этди – “Fox News” (видео)

“Fox News Decision Desk” лойиҳасига кўра, собиқ президент Дональд Трамп вице-президент Камола Ҳаррисни ажойиб рақамлар билан мағлуб этди ва Оқ уйда иккинчи муддатга сайланди. Бу ҳақда ўз прогнозларига таяниб “Fox News” нашри хабар берди.

Қайд этилишича, беқарор штатлардан бўлган Жоржия ва Пенсильвания ҳам Трампга овоз берган ва у 67 млн 941 минг 98 овозлар сони билан 51,2 фозига эга бўлган. Камола Ҳаррисга эса 62 млн 901 минг 682 та овоз берилган, бу 47,4 фоизни ташкил қилади.    

Бироқ бу расмий натижалар эмас. Американинг бошқа оммавий ахборот воситаларида бошқача натижалар эълон қилинмоқда. Лекин уларда ҳам Трамп етакчилик қилмоқда.

Эслатиб ўтамиз, аввалроқ АҚШдаги президентлик сайловлари мамлакат тарихидаги энг қиммат сайловга айлангани ҳақида хабар берилганди. Демократик партиянинг Миллий қўмитаси ва унга алоқадор тузилмалар 2,3 миллиард доллардан ортиқ маблағ тўплашга эришди, шундан 1,9 миллиард доллари ишлатилди. Республикачилар эса жалб қилинган 1,8 миллиард доллардан 1,6 миллиард долларини сайлов кампаниясини ўтказишга йўналтирди.

Таҳлилларга кўра, маблағларнинг қарийб ярми оммавий ахборот воситалари ва ижтимоий тармоқларда асосан еттита беқарор штатда (Аризона, Невада, Висконсин, Жоржия, Шимолий Каролина, Пенсилвания ва Мичиган) реклама учун йўналтирилган.