Toshkentning bir nechta markaziy ko‘chalari vaqtincha yopiladi

Toshkentda ommaviy yugurish musobaqasi o‘tkazilishi munosabati bilan ertaga, 19 fevral kuni soat 07:00 dan soat 09:30 gacha bir nechta markaziy ko‘chalar yopiladi. Bu haqda poytaxt hokimligi Axborot xizmati xabar qildi.

Quyida yopilishi kutilayotgan ko‘chalar ro‘yxati va xaritasi ilova qilinadi:

• Xalqlar do‘stligi san’at saroyi oldi maydonidan Furqat ko‘chasi bo‘ylab Beshyog‘och ko‘chasi kesishgan joyigacha;
• Beshyog‘och ko‘chasi bo‘ylab Islom Karimov ko‘chasi bilan kesishgan joygacha;
• Islom Karimov ko‘chasi bo‘ylab Amir Temur shoh ko‘chasi bilan kesishgan joygacha;
• Amir Temur shoh ko‘chasidan Amir Temur xiyoboni aylanma yo‘li bo‘ylab Islom Karimov ko‘chasi bilan kesishgan joygacha;
• Islom Karimov ko‘chasi bo‘ylab Xalqlar do‘stligi san’at saroyi oldi maydonigacha bo‘lgan ko‘chalarda avtomobillarning harakatlanishiga vaqtinchalik cheklovlar o‘rnatiladi.

“Haydovchilarga aylanma yo‘llardan foydalanishni tavsiya etamiz va yuzaga kelgan noqulaylik uchun uzr so‘raymiz”, deyiladi hokimlik xabarida.