Toshkentda yangi tug‘ilgan chaqaloq ko‘chaga tashlab ketildi (video)

Toshkent shahridagi ko‘chalardan birida paket ichida yangi tug‘ilgan chaqaloq  topildi. Bu haqda Ichki ishlar vazirligi Jamoat xavfsizligi departamenti xabar berdi.

Bildirilishicha, joriy yilning 15 yanvar kuni tongi soat 7:30 larda ko‘chada turgan bozorpaket Yangihayot tumanining Zarbdor mahallasida istiqomat qiluvchi fuqaroning diqqatini tortgan. Dastlab paket harakatlana boshlagan. So‘ng uning ichidan bolaning yig‘isi eshitilgan. Borib qaraganda paket ichidan bir kunlik chaqaloq topilgan.

Fuqaro darhol 102 raqamiga qo‘ng‘iroq qilgan. Voqea joyiga yetib borgan xodimlar chaqaloqni tekshirib ko‘rgan va shifoxonaga olib borgan. Unga zarur tibbiy yordam ko‘rsatilgan.

Tez tibbiy yordam shifokorining aytishicha, chaqaloqning tug‘ilganiga taxminan bir soat bo‘lgan. Uning kindigi ham noodatiy usulda kesilgan. Hozirda chaqaloqning holati barqaror.

Mazkur holat yuzasidan Yangi Hayot tumani ichki ishlar organlari faoliyatini muvofiqlashtirish boshqarmasi tomonidan tergovga qadar tekshiruv harakatlari olib borilmoqda.