Toshkentda yana yong‘in. Yashnobodda do‘kon va 2 ta MCHJga o‘t ketdi

Ijtimoiy tarmoqlarda Yashnobod tumani Tuzel-2 dahasidagi atir do‘konlaridan biri yonib ketganligi aks etgan video tarqaldi. Ushbu holat yuzasidan Favqulodda vaziyatlar vazirligi ma’lumot berdi.

Aniqlanishicha, bugun, 18 avgust kuni soat 01:57 da Toshkent shahar Yashnobod tumani “Vatandosh” MFY Tuzel-2 dahasida joylashgan ko‘p qavatli uyning 1-qavatida atir-upa do‘konining 35 kv.m va unga tutash bo‘lgan 2 ta MCHJning 15 kv.m maydonda ofis uchun mo‘ljallangan xona jihozlari yonib zararlangan.

Yong‘inni bartaraf etishga 4 ta yong‘in-qutqaruv ekipaji va 1 ta avtonarvon jalb etilgan. Ekipajlar hodisa joyiga soat 01:59 da yetib borgan va yong‘in soat 02:10 da o‘chirilgan.

Qutqaruvchilarning tezkor harakatlari natijasida savdo do‘konining 60 kv.m maydoni, MCHJlarning 90 kv.m maydoni yong‘indan saqlab qolingan. 

Yong‘in oqibatida fuqarolarni tan jarohati olish va halok bo‘lish holatlari yo‘q. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.

Eslatib o‘tamiz, bugun Toshkent shahri Mirzo Ulug‘bek tumanida ham ko‘p qavatli uyning 5-qavatida yong‘in sodir bo‘lgandi.