Toshkentda Putin va Zelenskiy graffiti o‘chirib ketildi

Inkuzart taxallusi bilan ijod qilayotgan ko‘cha rassomi Toshkentning Chilonzor tumanidagi ko‘chaga Ukraina Prezidenti Vladimir Zelenskiy va Rossiya Prezidenti Vladimir Putinga bag‘ishlangan graffit chizgani haqida xabar bergan edik. Surat bo‘rtma devorga chizilgan bo‘lib, qaysi tomondan qarashga ko‘ra, Putin yoki Zelenskiy tasviri aks etgandi.

Biroq, ijtimoiy tarmoq faollarining ma’lum qilishicha, mazkur grafit chiziganiga hali ko‘p bo‘lmasdanoq o‘chirib ketilgan. Bu ishni kim qilgani noma’lum.

Qayd etish kerakki, Inkuzart tomonidan Toshkent ko‘chalaridagi devorlarga chizilgan qator suratlar hokimiyat vakillari tomonidan o‘chirtirilgan. Bular qatorida UzautoMotors monopoliyasi, benzin narxi oshib ketgani hamda taniqli olim Albert Eyntshteynga bag‘ishlab chizilgan suratlarni keltirish mumkin. 

Shuningdek, gimnastikachi Oksana Chusovitinaga atalgan graffit boshqalar tomonidan o‘zgartirib qo‘yilgan.