Toshkentda onasi tomonidan ayovsiz kaltaklangan 4 yoshli qiz vafot etdi

Avvalroq, Toshkent viloyati Chirchiq shahrida ona 4 yoshli qizini ayovsiz kaltaklagani va og‘ir tan jarohati yetkazgani xabar qilingan edi. Qizcha bugun, 7 yanvar kuni vafot etgan. Holatga aniqlik kiritish maqsadida QALAMPIR.UZ Bolalar ombudsmani Surayyo Rahmonova bilan bog‘landi.

Uning bildirishicha, 2020 yilda tug‘ilgan qiz Y.M.  bugun, 7 yanvar kuni ertalab vafot etgan. Hozirda holat yuzasidan tergov jarayoni davom etmoqda va yakuniy xulosa sud tomonidan beriladi.

“Tergov vaqtida jinoyat natijasidagi oqibat o‘zgargani, ya’ni jabrlanuvchining o‘limi fakti jinoyatga huquqiy baho berish jarayoniga ta’sir qiladi – og‘irroq jazoni ko‘zda tutuvchi qismga qayta malakalash lozim bo‘ladi. Bu tergov tomonidan amalga oshiriladi”, deydi Bolalar ombudsmani.

Ma’lumot uchun, 2024 yilning 23 dekabr kuni Toshkent viloyati Bo‘stonliq tuman tibbiyot birlashmasiga 2020 yilda tug‘ilgan qiz Y.M. tanasidagi turli jarohatlar bilan qabul qilingan. Holat yuzasidan o‘tkazilgan tergovga qadar tekshiruv natijasida 47 yoshli ayol 4 yoshli qizini qattiq kaltaklab, tan jarohati yetkazgani aniqlangan. Tibbiyot xulosasiga ko‘ra, bolada bosh miya yopiq jarohati, bosh miya lat yeyishi og‘ir darajasi va bosh sohasidagi boshqa og‘ir jarohatlar qayd etilgan.

2024 yil 27 dekabr kuni holat yuzasidan Toshkent viloyati Chirchiq shahar IIB  tomonidan E.Y ga nisbatan Jinoyat kodeksining 126 prim 1-moddasi 7-qismi “b” bandi (oilaviy zo‘ravonlik) bilan jinoyat ishi qo‘zg‘atilgan.