Toshkentda migrantlarning qarindoshlariga pul yetkazayotgan kurer talandi

Toshkent shahrida migrantlarning qarindoshlariga pul yetkazayotgan kurerni uch kishi talab, undan 180 ming dollar o‘g‘irlashga urindi. Bu haqda Toshkent shahar IIBB matbuot xizmati xabar berdi.

Qayd etilishicha, hodisa fevral oyining boshida Shayxontohur tumanida sodir bo‘lgan. Farg‘onalik 3 nafar fuqaro ushbu jinoyatda gumon qilinib, qo‘lga olingan. Ular Rossiyadagi migrantlarning O‘zbekistondagi qarindoshlariga pul yetkazib berayotgan erkakni talashga uringan va deyarli 180 ming dollarni o‘g‘irlashga harakat qilgan.

Gumonlanuvchilar jabrlanuvchini oldindan tanigan va hujumni rejalashtirgan. Ular unga go‘yoki Toshkentdagi qarindoshlariga pul topshirish bahonasida bog‘lanib, uchrashuvga kelishgan.

Kurer belgilangan joyga yetib kelganida 2 erkak Captiva avtomobiliga o‘tirgan. Ulardan biri haydovchining boshiga zarba bergan, ikkinchisi esa ichida 180 ming dollar pul bo‘lgan paketni olgan. Biroq haydovchi qarshilik ko‘rsatgani sababli ularga faqat 20 ming dollarni qo‘lga kiritish nasib qilgan. So‘ngra ular Nexia-3 mashinasiga o‘tirib, hodisa joyidan yashiringan. Hozirda gumonlanuvchilar qo‘lga olingan, tergov davom etmoqda.

Eslatib o‘tamiz, avvalroq Toshkent shahrida 55 mln so‘mlik oyoq kiyimlarni o‘g‘irlashda gumonlangan 35 yoshli shaxs ushlangandi. Mazkur holat yuzasidan O‘zbekiston Respublikasi Jinoyat kodeksining 169-moddasi (O‘g‘rilik) bilan jinoyat ishi qo‘zg‘atilgan.