Yangiyo‘lda bir oilaning 5 a’zosini o‘ldirgan qotil umrbodga qamaldi

Toshkent viloyatida bir oilaning 5 nafar a’zosini o‘ldirgan qotil umrbod ozodlikdan mahrum qilindi. Bu haqda Oliy sud matbuot kotibi Aziz Obidov xabar berdi.

Qayd etilishicha, bugun, 28 noyabr kuni Toshkent viloyat sudida Z.S.ga (erkak, 1995 yilda Namangan viloyatida tug‘ilgan) oid jinoyat ishini birinchi instansiyasida ko‘rib chiqish bo‘yicha sud jarayoni yakunlanib, sud hukmi e’lon qilingan.

Ushbu jinoyat ishi Toshkent viloyat sudining jinoyat ishlari bo‘yicha sudyasi B. Roziqov raisligida Jinoiy-protsessual kodeksining 19-moddasi talablariga muvofiq yopiq sud majlisida ko‘rib chiqildi.

E’lon qilingan sud hukmiga muvofiq Z.S. Jinoyat kodeksining 97-moddasi (Qasddan odam o‘ldirish) 2-qismi “a”, “v”, “j”, “z”, “i” bandlari, 118-moddasi (Nomusga tegish) 1-qismi, 134-moddasi (Qabrni tahqirlash), 164-moddasi (Bosqinchilik) 3-qismi “v”, “g” bandlari va 173-moddasi  (Mulkni qasddan nobud qilish yoki unga zarar yetkazish) 2-qismi “b” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasi tartibida umrbod ozodlikdan mahrum qilish jazosi tayinlandi. Tayinlangan jazoni maxsus tartibli koloniyalarda o‘tash belgilandi.

“Birinchi instansiya sudining hukmi ustidan taraflar qonunda belgilangan tartib va muddatda Toshkent viloyat sudining jinoyat ishlari bo‘yicha sudlov hay’atiga apellyatsiya yoki kassatsiya tartibida shikoyat berish va protest keltirishga haqliligi ma’lum qilinadi”, deyiladi xabarda.

 Voqea qanday sodir bo‘lgan edi?

Joriy yilning 26 iyul kuni soat 06:19 larda Yangiyo‘l tumani Nurafshon ko‘chasida joylashgan xonadonda yong‘in sodir bo‘layotgani to‘g‘risida xabar kelib tushgan. Xabarga asosan Yangiyo‘l tumani FVB Yong‘in qutqaruv qismi o‘t o‘chiruvchilari voqea joyiga yetib borgan va kelib chiqqan yong‘in bartaraf etilgan.

Xonadonni ko‘zdan kechirish davomida 1991 yilda tug‘ilgan  erkak, 1999  yilda tug‘ilgan ayol, 2021 va 2022 yilda tug‘ilgan bolalar, 2018 yilda tug‘ilgan qizning murdalari turli tan jarohatlari bilan topilgan. Ma’lum qilinishicha, vafot etganlar er-xotin va ularning  2 nafar farzandi, 1 nafar qiz jiyani bo‘lgan.

Ushbu jinoyatni sodir etganlikda gumonlanayotgan shaxs protsessual tartibda ushlangan. Dastlabki ma’lumotlarga ko‘ra, 29 yoshdagi gumonlanuvchi shaxs marhumning qarindoshi hisoblanib, u ushbu jinoyatni o‘rtalarida mavjud bo‘lgan qarz munosabati sababli sodir etgan.