Toshkentda beton to‘siqqa urilgan Matiz yonib ketdi

Toshkent shahar Yunusobod tumanida Matiz beton to‘siqqa to‘qnashib, yonib ketdi. Bu haqda Toshkent shahar Ichki ishlar bosh boshqarmasi Yo‘l harakati xavfsizligi boshqarmasi xabar berdi.

Qayd etilishicha, bugun, 6 dekabr kuni soat taxminan 06:50 larda Yunusobod tumani Abdulla Qodiriy ko‘chasi 36-uy qarshisida Matiz rusumli transport vositasining 32 yoshli haydovchisi A.A. rul boshqaruvini yo‘qotgan va beton to‘siqqa to‘qnashib, yo‘l-transport hodisasi sodir etishi oqibatida avtomashinada yong‘in kelib chiqqan.

Yong‘in tuman FVB xodimlari tomonidan bartaraf etilgan. YTH oqibatida tan jarohat olganlar bo‘lmagan. Hodisa yuzasidan YHXB hamda FVB xodimlari tomonidan surishtiruv harakatlari olib borilmoqda.

“Barcha haydovchilardan yo‘llarda yo‘l harakati qoidalariga amal qilishlarini so‘raymiz”, deyiladi xabarda.

Eslatib o‘tamiz, avvalroq ham Toshkent shahri Yunusobod tumanida uchta mashina ishtirokida yo‘l-transport hodisasi sodir bo‘lgandi. YTH oqibatida Volkswagen’da yong‘in chiqqan.